ನಂಗೊತ್ತಿಲ್ಲ ಮಗು

ಅಪ್ಪಾ
ಏನು ಮಗು?
ಕಾಂಗ್ರೇಸ್ ಇತ್ತು
ಈಗಲೂ ಇದೆ ಅನ್ನು..
ಹೌದು ಮಗು,
ಜನತಾ ಅಂತ ಇತ್ತು
ಈಗ, ಆ ಜಪಾ, ಇಜಪಾ, ಉಜಪಾ
ಲೆಫ್ಟು, ರೈಟು, ಫಾರ್ವರ್ಡು ಬ್ಯಾಕ್ ವರ್ಡು
ಪ್ರಥಮ, ದ್ವಿತೀಯ, ತೃತೀಯ ಮತ್ತೆ ಈಗ
ಚತುರ್ಥ ರಂಗ ಅಂತೆ..
ಯಾಕಪ್ಪಾ?
ನಂಗೊತ್ತಿಲ್ಲ ಮಗು

ಅಪ್ಪಾ
ಒಡೆದು ಆಳೋಕೆ
ಸಂಚು ಮಾಡ್ತಾರಂತೆ ಅಲ್ವೇ ಅಪ್ಪಾ..
ಹೌದು ಮಗು..
ಮತ್ತೆ... ಬದ್ಧ ವೈರಿಗಳ ತರಹ ಇದ್ದೋರು
ಯಾರೂ ಶಾಶ್ವತ ಶತೃಗಳಲ್ಲ
ಹಾಗೇ ಶಾಶ್ವತ ಮಿತ್ರರೂ ಅಲ್ಲ ಅಂತಾರಲ್ಲ
ಹೌದು ಮಗು..
ಹಾಗಾದ್ರೆ ಅವರಿಗೋಸ್ಕರ
ಪ್ರಾಣಗಳನ್ನೇ ಕಳಕೊಳ್ಳೋ ನಾವು ಮೂರ್ಖರಲ್ಲವೇ..
ನಂಗೊತ್ತಿಲ್ಲ ಮಗು

ಅಪ್ಪಾ
ಹೇಳು ಮಗು
ನೂರಕ್ಕಿಂತ ಹೆಚ್ಚಿಂದು ದೊಡ್ಡದೋ
ಐವತ್ತಕ್ಕಿಂತ ಕಡಿಮೇದು ದೊಡ್ಡದೋ?
ಸಾರ್ಥಕ ಆಯ್ತು ನಿನ್ಗೆ ಗಣಿತ ಕಲಿಸಿದ್ದಕ್ಕೆ
ನೂರು- ಐವತ್ತಕ್ಕಿಂತ ದೊಡ್ಡದಲ್ಲವೇನೋ..???
ಮತ್ತೆ.. 30-40 ಸೀಟಿರೋ ಪಕ್ಷ
ನೂರಕ್ಕಿಂತ ಹೆಚ್ಚಿರೋ ಪಕ್ಷಾನ ಆಟ ಆಡ್ಸುತ್ತಲ್ಲಾ?
ಅವರಿಗೆ ಗಣಿತ ಗೊತ್ತಿಲ್ವಾ ಅಪ್ಪ??
ನಂಗೊತ್ತಿಲ್ಲ ಮಗು