ಕಿರಣ......

ಚಿತ್ರ: ದಿಗ್ವಾಸ್ ಹೆಗಡೆ

ಕಿರಣ

ಮರೆಯಾಗಹೊರಟ ಸೂರ್ಯ

ಅಡಗಿ ದಿಗಂತದಿ, ಆಯ್ತು ದಿನವೆಲ್ಲವೂ

ಧರಿತ್ರಿಯ ಒಂದೆಡೆಯ ಕಾರ್ಯ

ನಿರಂತರ ಅವಗೆ, 

ಇಲ್ಲ ರಾತ್ರಿ, ಇಲ್ಲ ನೆಳಲು, 

ಇಲ್ಲ ತಂಪು, ಇಲ್ಲ ಕಡಲು.

ಒಡಲೊಳಗಿಹ ಕೆಂಡದುಂಡೆ

ಹೊರ ಉಗುಳುವ ಜೀವ ಕಿರಣ

ಆವಿಯಾಗಿಸಿ ಮಾಡಿ ನೀರಹರಣ

ಜಲವುಂಡ ಸಾಗರವೇ ಹಂಡೆ

ಒಬ್ಬ ಸೂರ್ಯ ಬ್ರಹ್ಮಾಂಡದಿ

ಎಷ್ಟೋ ಭೂಮಿಗಳ ಬೆಳಗಿಹ

ಎಷ್ಟೋ ಸಾಗರಗಳ ತೊಯ್ದಿಹ

ಆದರೂ, ಸುಮ್ಮನೆ ಮರೆಯಾಗುವ

ದಿಗಂತದಿ ಚಿನ್ನದೋಕುಳಿಯಾಡಿ

ಒಂದೆಡೆ ತಂಪಿಗೆ ಒಂದೆಡೆ ಕಂಪಿಗೆ

ಒಂದೆಡೆ ಚುಮುಚುಮು ಛಳಿಯಪ್ಪುಗೆ

ಭ್ರಮರ ಹಾತೊರೆವ ಹೂ ಕಂಪಿಗೆ

ಜೀವ ಜಾಲದ ಹೂರಣ ಅವನಲ್ಲಿ

ಮರಗಿಡ ಚರಾಚರ ಇವೆ ಬಳಿಯಲ್ಲಿ

ಬೆಳಕೂ ಅವನೇ ಕತ್ತಲೂ ಅವನೇ

ಶಕ್ತಿಸಾರದ ಮೂಲವೂ ಅವನೇ