ಬ್ಲಾಗಿಗರ ಸಂತೋಷ ಕೂಟ

ಬ್ಲಾಗಿಗರ ಸಂತೋಷ ಕೂಟ



ಮಿತ್ರರೇ ಈಗಾಗಲೇ ಪ್ರಕಾಶ್ ಮತ್ತು ಶಿವು ತಮಗೆಲ್ಲ ಬ್ಲಾಗಿಗರ ಕೂಟದ ಬಗ್ಗೆ ತಿಳಿಸಿದ್ದಾರೆ. ಹೀಗೊಂದು ಕೂಟದ ಆಯೋಜನೆಗೆ ನಾವೆಲ್ಲಾ ಮುಂದಾಗುತ್ತಿರುವುದು ಕನ್ನಡದ ಬ್ಲಾಗಿಗಳು ಯಾರಿಗೂ ಕಡಿಮೆಯಿಲ್ಲ ಎನ್ನುವುದನ್ನು ತೋರಿಸುತ್ತದೆ. ಎಲ್ಲ ಸ್ನೇಹಿತರೂ ನನ್ನ ಮೊದಲ ಪ್ರಸ್ತಾಪದಲ್ಲೇ ಬಹಳ ಹುಮ್ಮಸ್ಸಿನ ಸಕಾರಾತ್ಮಕ ಪ್ರತಿಕ್ರಿಯೆ ನೀಡಿದ್ದಿರಿ. ಅದರಂತೆ ಪ್ರಕಾಶ್, ಶಿವು, ತೇಜಸ್ವಿನಿ, ದಿನಕರ್, ...ಹೀಗೆ ಹಲವರೊಂದಿಗೆ ಚರ್ಚಿಸಿ ಪ್ರಾರಂಭವಾಗಿಬಿಡಲಿ ಎಂದು ಮುಂಬರುವ ಆಗಸ್ಟ್ 22 ಕ್ಕೆ ಈ ಬ್ಲಾಗಿಗರ ಕೂಟದ ಆಯೋಜನೆಯನ್ನು ಹಮ್ಮಿಕೊಂಡಿದ್ದೇವೆ.


ಈ ಸಂದರ್ಭದಲ್ಲಿ ಬ್ಲಾಗಿಗರ ಆಯ್ದ ಲೇಖನಗಳ ಪುಸ್ತಕದ ಬಗ್ಗೆಯೂ ಸಕಾರಾತ್ಮಕ ಪ್ರತಿಕ್ರಿಯೆ ಬಂದಿದ್ದರಿಂದ, ಇಂತಹ ಪುಸ್ತಕದ ಬಿಡುಗಡೆಯನ್ನೂ ಮಾಡುವುದೆಂದು ಯೋಚಿಸಿ ಎಲ್ಲ ಸ್ನೇಹಿತರಿಗೆ ಸಂದೇಶವನ್ನು ನಮ್ಮ ಸ್ನೇಹಿತರಾದ ಶಿವು, ದಿನಕರ್, ಶಿವಶಂಕರ್ ಎಳವತ್ತಿ, ಈಶ್ ಮತ್ತು ಹೊರನಾಡ ಕನ್ನಡಿಗರ ಸಂಚಾಲಕರಾಗಿ ಡಾ. ಗುರು ಹಾಗೂ ಶ್ರೀ ಉದಯ್ ಇಟ್ಟಿಗಿ ಯವರು ತಿಳಿಸಿರುತ್ತಾರೆ ಅಥವಾ ತಿಳಿಸಲಿದ್ದಾರೆ.


ಬ್ಲಾಗ್ ಕೂಟದ ಆಯೊಜನೆ ಮತ್ತು ಇತರ ವೆಚ್ಚ ಭರಿಸಲು ಬ್ಲಾಗಿಗಳ ಪುಸ್ತಕ ಪ್ರಕಟಣೆಯಲ್ಲಿ ಲೇಖನ ಪ್ರಕಟಿಸುವ ಬ್ಲಾಗು ಮಿತ್ರರಿಂದ ತಮ್ಮ ಲೇಖನದ 1 ಪುಟಕ್ಕೆ ರೂ 150/- ಅಥವಾ 2 ಪುಟದ ಲೇಖನವಾದರೆ ರೂ 250/- ಸಂಗ್ರಹಿಸುವುದೆಂದು ಯೋಚಿಸಿದ್ದೇವೆ. ಇದರ ಜೊತೆಗೆ ನಮ್ಮ ಕೆಲ ಬ್ಲಾಗು ಮಿತ್ರರು ಸ್ವಪ್ರೇರಿತ ದೇಣಿಗೆಯನ್ನೂ ಈ ಕಾರ್ಯಕ್ರಮಕ್ಕಾಗಿ ನೀಡಲಿದ್ದಾರೆ.


ಈ ಕೂಟದ ಕಾರ್ಯಕ್ರಮಗಳಲ್ಲಿ ಏನನ್ನು ನೀವು ಅಪೇಕ್ಷಿಸುತ್ತೀರಿ ಎನ್ನುವುದನ್ನೂ ತಿಳಿಸಿ...ನಿಮ್ಮ ಸಲಹೆ ಮತ್ತು ಹುಮ್ಮಸ್ಸಿನ ಸಹಕಾರ ನಮ್ಮ ಮುಂದಿನ ಹೆಜ್ಜೆಗೆ ಪ್ರೋತ್ಸಾಹ ನೀಡುವುದಂತೂ ಖಂಡಿತ.

ಲೇಖನ ಕಳುಹಿಸುವ ವಿಷಯದಿಂದ ಮೊದಲುಗೊಂಡು ಈ ಬ್ಲಾಗಿಗರ ಕೂಟದ ಯಶಸ್ಸಿಗೆ ನೀವೆಲ್ಲಾ ಕೈಜೋಡಿಸಬೇಕೆಂದು ವಿನಂತಿ..ನಿಮ್ಮ ನಿಮ್ಮ ಸ್ನೇಹಿತರ ವರ್ತು ಲದಲ್ಲಿ ಇದಕ್ಕೆ ಹೆಚ್ಚು ಪ್ರಚಾರ ಸಿಗಬೇಕು.. ..ಇದು ಒಂದು ಉತ್ತಮ ಪ್ರಾರಂಭವಾಗಬೇಕು..ಮುಂದಿನ ಅಮೋಘ ಕಾರ್ಯಕ್ರಮಗಳಿಗೆ.


ಈಗ ನನ್ನ ವಿನಂತಿಯೂ ಇಷ್ಟೇ..ತಮ್ಮ ಕೆಲಸದ ನಡುವೆಯೇ ಬ್ಲಾಗಿಗರ ನಮ್ಮ ಆಗಸ್ಟ್ 22 ರ ಕೂಟಕ್ಕೆ ಶಿವು (ಪ್ರಕಾಶ್ ಸಂಪೂರ್ಣ ಸಹಕಾರ ಸಿಗುತ್ತೆ ಎಂದಿದ್ದಾರೆ ತಮ್ಮ ಕಾರ್ಯವ್ಯಸ್ತತೆಯ ಕಾರಣ..ಹಾಗೆ ಹೇಳಿದ್ರೂ ಹಲವಾರು ಬಾರಿ ಅವರೇ ನಮ್ಮೊಂದಿಗೆ ಚರ್ಚಿಸಿದ್ದಾರೆ..) ಜೊತೆಗೆ ಶಿವಪ್ರಕಾಶ್ ತಮ್ಮ ಸಹಕಾರ ನೀಡುವ ಭರವಸೆ ನೀಡಿದ್ದಾರೆ..ಹಾಗೆಯೇ ವಿವಿಧ ಪ್ರದೇಶಗಳಿಂದ ಲೇಖನಗಳನ್ನು ಸಂಗ್ರಹಿಸಿ ಅವುಗಳ ಪೂರ್ವಭಾವಿ ಪರಿಶೀಲನೆ ಮಾಡಿ ಶಿವು ಗೆ ರವಾನಿಸಲು ಹಲವು ಬ್ಲಾಗು ಮಿತ್ರರು ಸಹಾಯಕ್ಕೆ ಮುಂದಾಗಿದ್ದಾರೆ..

ಕೆಳಕಂಡ ಮೈಲ್ ವಿಳಾಸಕ್ಕೆ ನಿಮ್ಮ ನಿಮ್ಮ ಪ್ರತಿಕ್ರಿಯೆ, ಕಾದಿರಸಬೇಕಾದ ಪುಟಗಳ ಸಂಖ್ಯೆ ಮತ್ತು ನಿಮ್ಮ ಲೇಖನಗಳನ್ನು ಕಳುಹಿಸಿಕೊಡಿ



Mail your responses to
shivuu.k@gmail.com (ಛಾಯಾಕನ್ನಡಿ) - ಬೆಂಗಳೂರು ಮತ್ತು ಸುತ್ತಮುತ್ತಲ ಬ್ಲಾಗಿಗಳು

dinakar.moger@gmail.com (ಮೂಕ ಮನದ ಮಾತು) - ಮಂಗಳೂರು, ಉಡುಪಿ, ಕುಂದಾಪುರ. ಇತ್ಯಾದಿ ಕರಾವಳಿ ಬ್ಲಾಗಿಗಳು.

hneshakumar@gmail.com (ಸಹಯಾತ್ರಿ) - ಮೈಸೂರು, ಹಾಸನ, ಚಿತ್ರದುರ್ಗ, ಮಂಡ್ಯ ಸುತ್ತ ಮುತ್ತಲ ಬ್ಲಾಗಿಗಳು
shivagadag@gmail.com (Shivashankar Elavatti) - ಧಾರವಾಡ, ಬೆಳಗಾವಿ, ಗುಲ್ಬರ್ಗ, ಬೀದರ್, ಗದಗ್ ಸುತ್ತಮುತ್ತಲ ಬ್ಲಾಗಿಗಳು

murthyhegde@gmail.com (ಸಾಗರದಾಚೆಯ ಇಂಚರ) ಮತ್ತು itagi.uday@gmail.com (ಉದಯ್)

- ಹೊರದೇಶದ ಬ್ಲಾಗಿಗಳು

ಜೋಡಿ-ತೋಳಗಳು

ಕಣ್ಣಲಿ ಕುಳಿತಿರುವ ಸಂಚು

ಎರಗಲಿವೆ ಹೊಡೆದಂತೆ ಮಿಂಚು

ಕುರಿಗೇನು ಗೊತ್ತು ಪೊದೆಯ

ಒಳಕುಳಿತಿವೆ ತೋಳ-ದ್ವಯ

ನಡೆದೇ ಇದೆ ಕುರುಬ ಕಾಯುವುದು

ಆಗೊಮ್ಮೆ ಈಗೊಮ್ಮೆ ಮೈಮರೆವುದು

ಸಮಯಕಾದಿವೆ ಸದ್ದಿಲ್ಲದೆ ಎರಗಲು

ಜೋಡಿ ತೋಳಗಳು ಕೊಟ್ಟು ಹೆಗಲಿಗೆ-ಹೆಗಲು

ಅಧಿಕಾರದ ನಿಲ್ಲದ ದರ್ಪ

ಅಧಿಕ-ಬೇಕೆನ್ನುವ ವಿಷ ಸರ್ಪ

ಎರಡೂ ನೋಡವು ಬಡವ-ಬಲ್ಲಿದ

ಕೊಬ್ಬಿ ಬೆಳೆದಿವೆ ತುಂಬಿಕೊಂಡು ಮದ

ಕೇಳುವುದಿಲ್ಲ ನಿಮ್ಮ ಸಹಮತ

ಬೇಕಾಗಿಲ್ಲ ನಿಮ್ಮ ಅಭಿಮತ

ಕಾರಣವಿರದ ಆಳುವ ರಾಜ

ಹೂರಣ ನೋಡುವ ಅಧಿಕಾರಿ ಭೋಜ

ಅನ್ನದಾತನ ಸಾಲವೇ ನೆಪ

ಹಣದಾತ ಚರ್ಮ ಸುಲಿವ ಭೂಪ

ಒಂದೆಡೆ ಕಿತ್ತು ತಿನ್ನುವ ಮಧ್ಯವರ್ತಿಗಳ ವರ್ತನೆ

ಮಗದೆಡೆ ಕುಣಿಕೆ ಹಗ್ಗಗಳ ಬೆಂಬಿಡದ ನರ್ತನೆ

ಇದ್ದ ಬದ್ದದ ಮಾರಿ ಮದು-ಮಗಳಮಾಡಿ

ಕಣ್ಣೀರು ಕುಡಿದರು ಅಮ್ಮ-ಅಪ್ಪನ ಜೋಡಿ

ಅತ್ತೆ ಮಾವನ ವರದಕ್ಷಿಣೆಯ ಕಿರುಕುಳ

ಉರಿಸಿ ಹಿಂಡುವರು ಹೆತ್ತವರ ಕರುಳ

ಕಛೇರಿಯಲ್ಲಿ ಹೇಳಿದ್ದೇ ವೇದ ಎನುವ ಬಾಸು

ಹೆಣ್ಣೆಂದರೆ ಏಕೆ ಎಲ್ಲಆಗುವರು ಪೀಪಾಸು ?

ತೋಳಗಳು ಅನ್ನಕಾಗಿ, ಉಳಿವಿಗಾಗಿ ಎರಗಿದರೆ

ತಮ್ಮರಕ್ಷಣೆಗೆ ಸರ್ಪಗಳು, ತಪ್ಪೇನು ಬುಸುಗುಟ್ಟಿದರೆ?

ತೃಷೆ, ಪೀಪಾಸೆ ಅಧಿಕಾರ ಹಣದಾಸೆ

ಕಾಡಿ-ಪೀಡಿಸುವುದೇ ಮಾನವನ ವರಸೆ

ಕೇಡ ಮಾಡಲು ಬೇಧವಿಲ್ಲ ಒಂದಾಗುವರು

ಅಪವಾದ ಜೋಡಿತೋಳ - ಇವರಾಗುವರು

ಸುರ-ಸುಂದರ ರಂಗೋಲಿ

“ನಮಸ್ಕಾರ...ಸುರೇಸಣ್ಣ...ಹೆಂಗಿದ್ದೀಯಾ...?”



ಮನೆ ಬಾಗಿಲು ಅಗುಳಿ ತೆರೆದೇ ಇತ್ತು, ಬಾಗಿಲನು ತಳ್ಳುತ್ತಾ ಒಳಕ್ಕೆ ಬಂದ- ಸಲೀಂ....!! ಗಾಬರಿಯಾಗಿ ನಿಂತು ಬಿಟ್ಟ...


ಅರೆರೆ ಏನಿದು ಹೋಳಿ ಹಬ್ಬ ಹೋಗಿ ಜಮಾನಾ ಆಯ್ತು..


“ಸರ್..ನೀವು..ಚಾಟ್ ನಲ್ಲಿ ಹೇಗಾದ್ರೂ ಕರೀರಿ..ಇಲ್ಲಿ ಬಂದು... ನನಗಿಂತ 10-15 ವರ್ಷ ದೊಡ್ಡೋರು ನೀವು..ಹಿಂಗ್ ನನ್ನ ಸುರೇಸಣ್ಣ ಅಂತ ಅಣ್ಣ ಅನ್ನಬಾರ್ದು...... ನಿಮಗೆ ಪಾನಿನೀನೂ ಪರ್ಮಿಶನ್ ಕೊಡೊಲ್ಲಾ...ಕನ್ನಡ ಪಂಡಿತರೂ ಅನುಮತಿ ಕೊಡೊಲ್ಲಾ....”


ತಲೆಮೇಲೆ...ಬಿಳಿ, ಹಳದಿ, ಕೆಂಪು ಬಣ್ಣ ಹಾರಿಸಿಕೊಂಡಿದ್ದ..ಸುರೇಶ್ ಸಲೀಂ ನ ಸ್ವಾಗತಿಸಿದ್ದು ಹೀಗೆ...


“ಅಲ್ಲ ಸುರೇಶ್ ಹೋಳೀ ಹೋಗಿ ಕಾಲ ಆಯ್ತು..., ಇದೇನು ಬಣ್ಬಣ್ಣ ತಲೇ ಮೇಲೆ...ಅಂದಹಾಗೆ ...ಪಾಂಡುರಂಗ ವಿಠಲನ್ನ ಹೆಚ್ಚುನೋಡ್ಬೇಡಿ...ಆಮೇಲೆ...ಭಾಭಿನ ಸುಂದಲಿ..ಸುಂದಲಿ ಅಂತ...ಅಂದ್ರೆ ಕಷ್ಟ....”


ನಗ್ತಾ ಮತ್ತೆ ಕೇಳಿದ ಸಲೀಂ ...


“ಅಲ್ಲಾ..ಇದೇನು ಬಣ್ಣ ಅಂತೀನಿ...?!!”


“ಅಯ್ಯೋ ಸಲೀಂ ಸರ್...ನಮ್ಮ ಸಂಘ ಮಾಡೋ ರಂಗೋಲಿ ಕಾಂಪಿಟೇಶನ್ ಗೆ ಸುಂದರೀನೂ ಭಾಗವಹಿಸ್ತೀನಿ ಅಂದ್ಲು...ಸರಿ ಮಾರಾಯ್ತಿ ..ಮಾಡು..ಅಂದೆ...


ಅಲ್ಲ ಸರ್...ನೀವೇ ಹೇಳಿ..., ಅಭ್ಯಾಸಾನೇ ಇಲ್ದೇ ಇದ್ರೆ ರಂಗೋಲಿ ಹಾಕಿ ಗೆಲ್ಲೋಕಾಗ್ತದಾ...?”


ತನ್ನ ಪ್ರಶ್ನೆ ಸಲೀಂ ಮುಂದೆ ಇಟ್ಟ ಸುರೇಶ ...ತನ್ನ ಕಥೆ ಮುದುವರೆಸಿದ


“ನಿಮಗ್ಯಾಕೆ ನಾನು ಪ್ರಾಕ್ಟೀಸ್ ಮಾಡ್ತೀನಿ, ತಂದುಕೊಡಿ ಬಣ್ಣದ ಪುಡಿ.. ಅಂತ ಹಠ ಇವಳದ್ದು....ಹೇಳಿ ಕೇಳಿ..ಕುವೈಟ್ನಂಥಾ ದೇಶದಲ್ಲಿ ಎಲ್ಲಿಂದ ತರೋದು ರಂಗೋಲಿ ರಂಗಿನ ಪುಡಿ...?? ಹುಡ್ಕಾಡ್ದೆ ಎಲ್ಲೂ ಸಿಗ್ಲಿಲ್ಲ.....!!”


ಆಶ್ಚರ್ಯದಿಂದ ಸಲೀಂ ಕೇಳಿದ..


“ಮತ್ತೆ ...ಈ ಬಣ್ಣ ಎಲ್ಲಿಯದು ?”


ಸುರೇಶ ಹೇಳ್ದ “ಅದೇ ಸರ್...ಕಲರ್ ಕಲರ್ ಚಾಕ್ ತಂದಿದ್ನಲ್ಲ ಮಕ್ಕಳಿಗೆ ಅಕ್ಷರಾಭ್ಯಾಸ ಮಾಡಿಸೋಕೆ...ಅದನ್ನೇ ಒಂದೊಂದು ಬಣ್ಣದ್ದೂ ಹತ್ತು ಹನ್ನೆರಡು ಚಾಕ್ ನ ಮಿಕ್ಸರ್ ಗೆ ಹಾಕಿ ಪುಡಿ ಮಾಡಿದ್ದು ...”


“ಅದು ಸರಿ ಪುಡಿಮಾಡಿದ್ರೆ..ಮುಖ.. ತಲೆಗೆಲ್ಲಾ ಯಾಕೆ ಮೆತ್ತಿಕೊಂಡ್ರಿ?” ಸಲೀಂ ಅರ್ಥವಾಗದೆ ಪ್ರಶ್ನಿಸಿದ..


“ಅಯ್ಯೋ..ಮಿಕ್ಸೀಗೆ ಹಾಕಿ ..ತಿರುವುತ್ತಾ ಇದ್ನಾ..ಇವ್ಳು ಸ್ವಿಚ್ ಆಫ್ ಮಾಡಿದ್ದು ನೋಡ್ಲಿಲ್ಲ ..ಅರೆ..!! ಯಾಕೋ ಮಿಕ್ಸಿ ನಿಲ್ತಲ್ಲಾ ಅಂತ ಲಿಡ್ ತೆಗೆದು ನೊಡೋಕೆ ಹೋದೆ.......”


“ಅಯ್ಯೋ ಸಲೀಮಣ್ಣ ...ನಾನು ಹೀಟರ್ ಆಫ್ ಮಾಡೋದ್ರ ಬದ್ಲು ಮಿಕ್ಸಿ ಸ್ವಿಚ್ ಆಫ್ ಮಾಡಿದ್ದೆ...ಆಮೇಲೆ ..ಗೊತ್ತಾಗಿ ಮತ್ತೆ ಸ್ವಿಚ್ ಆನ್ ಮಾಡಿದೆ...ಇವರು ಜೋರಾಗಿ ’ಥತ್ ತೇರಿ’..ಅಂತ ಅಂದಾಗ ಹಾಲ್ ಗೆ ಬಂದು ನೋಡಿದ್ರೆ ಈ ಅವ್ತಾರ ಮಾಡ್ಕೊಂಡಿದ್ರು...”


ಇವರ ಸಂಭಾಷಣೇನ ಕೇಳಿದ ಸುಂದರಿ ನಗ್ತಾ ಹಾಲ್ ಗೆ ಬರುತ್ತಾ...ಸಲೀಂ ಗೆ ಏನಾಯ್ತು ಎನ್ನುವುದರ ವಿವರ ಕೊಡ್ತಾ.. “ನಮಸ್ಕಾರ...ಬನ್ನಿ ಸಲೀಮಣ್ಣ” ಎಂದಳು.


“ಸುಂದರಮ್ಮನವರೇ...ನೀವು ಸಲೀಂ ಅನ್ನಿ ಇಲ್ಲ ಸಲೀಮ್ ಸರ್ ಅನ್ನಿ...ಸಲೀಮಣ್ಣ ಅನ್ಬೇಡಿ...ಜೇಡಿ ಮಣ್ಣ...ಕೆಂಪು ಮಣ್ಣ ಅಂದಂಗಿರುತ್ತೆ.....” ಎಂದ ಸಲೀಮ ನಗ್ತಾ....


“ನೋಡಿದ್ರಾ...? ನಿಮ್ಮ ತಂಗಿ ತರ ನಾನು, ನನ್ನ ಸುಂದರ ಅಮ್ಮ ಅಂತ ಕರೀತೀರಲ್ಲಾ...ಇದು ಸರೀನಾ...?”


ಎಂದಳು ಸುಂದರಿ ನುಸು ಮುನಿಸಿಂದ.


“ಸರಿ ಬಿಡಿ ಸುಂದರಿದೇವಿ ಅನ್ತೀನಿ ಇನ್ಮೇಲೆ....ಹಹಹ...” ರೇಗಿಸೋ ಹಾಗೆ ಸಲೀಮ್ ಹೇಳಿದಾಗ..


ಹುಸಿಕೋಪದಿಂದ ಹುಬ್ಬು ಮೇಲೇರಿಸಿ ಸಲೀಮನನ್ನು ನೋಡುತ್ತಿದ್ದ ತನ್ನ ಅರ್ಧಾಂಗಿಯನ್ನು ನೋಡಿದ ಸುರೇಶ...ಹೌದಲ್ಲಾ ..ನಾನೂ ಹಾಗೇ ಕರೀಬಹುದು ಇನ್ಮೇಲೆ... ಎನ್ನುವಾಗ ..”ಏನ್ರೀ ನೀವೂ ..???!!” ಎನ್ನುತ್ತ ಗಂಡನ ಬೆನ್ನಮೇಲೆ ಹುಸಿಮುನಿಸಿನ ಗುದ್ದು ಕೊಡಲು ಹೋದಾಗ ಸುರೇಶ ನಕ್ಕುಬಿಟ್ಟ.


“ಅಂದಹಾಗೆ ರಂಗೋಲಿಸ್ಪರ್ಧೆಲಿ .ಯಾರು ಭಗವಹಿಸೋದು? ..” ಸಲೀಂ ಕೇಳಿದ್ದಕ್ಕೆ...


ಸುರೇಶ-ಸುಂದರಿ ಇಬ್ಬರೂ ನಕ್ಕುಬಿಟ್ರು...


“ಏನ್ ಸರ್ ಈ ಅವತಾರ ನೊಡೀನೂ ಕೇಳಿದ್ದೀರಲ್ಲಾ...? ಎಲ್ಲ ರಂಗೋಲಿ ಹಿಟ್ಟೂ ಅಭಿಷೇಕ ಆಗೋಯ್ತು...ಇವ್ರನ್ನೇ ಅಲ್ಲಿ ಕೂತ್ಕೋಳೋಕೆ ಹೇಳ್ಬೇಕು ಅಷ್ಟೇ ಇದೇ ಅವತಾರದಲ್ಲಿ...ಹಹಹ...ಇವ್ರೇ ಕೂತ್ರೆ ಬಹುಮಾನ ಗ್ಯಾರಂಟಿ”


ಗಂಡನ ಅವತಾರದತ್ತ ನೋಡ್ತಾ ಹೆಂಡತಿ ನಕ್ಕು ...ಆ ಬಣ್ಣವನ್ನು ಕೊಡಹಿ...


“ಹೋಗ್ರಿ ನೀವು, ಮುಖ ತೊಳ್ಕೊಂಡು ಬನ್ನಿ ..ತಿಂಡಿ-ಕಾಫಿ ತರ್ತೀನಿ...ಸಲೀಮ್ ಸರ್ ಜೊತೆ ಮಾತನಾಡ್ತಾ ನಮ್ಮ ಪತ್ರಿಕೆ ಬರಹಗಳನ್ನ ಫೈನಲ್ ಮಾಡೋಣ” ಎನ್ನುತ್ತಾ.. “ಕೂತ್ಕೋಳಿ ಸರ್ ನೀವು...ಈ ಫೈಲ್ ನೋಡ್ತಾ ಇರಿ, ಇವ್ರೂ ಫ್ರೆಶ್ ಆಗಿ ಬರ್ತಾರೆ, ಅಷ್ಟೊತ್ತಿಗೆ ರಂಜನಾ, ವಿನಯ್ ಸರ್ ಮತ್ತೆ ಸಂಜಯ ಸರ್ ಬರ್ತಾರೆ ಎಲ್ಲ ಕುಳಿತು ತಿಂಡಿ-ಕಾಫಿ ತಗೊಳ್ತಾ ಫೈನಲ್ ಮಾಡೋಣ ನಮ್ಮ ಪತ್ರಿಕೇನಾ”


ಎನ್ನುತ್ತ ಅಡುಗೆಮನೆಯತ್ತ ಸುಂದರಿ ಹೋದರು..ಸಲೀಂ ಸೋಫಾದ ಮೇಲೆ ಆಸೀನನಾದ..ಸುರೇಶ ಮುಖ ತೊಳೆಯಲು ಬಾತ್ ರೂಮಿನತ್ತ ನಡೆದ. ಎಲ್ಲ ಬಣ್ಣಗಳ ಹಿತ ಮಿತ ಮಿಶ್ರಣದ ಹೋಳಿಯಂತೆ ಸಮರಸ ತುಂಬಿದ ಸಂಸಾರ ಎಲ್ಲ ಜಂಜಾಟವನ್ನೂ ಮರೆಸಿದರೆ, ಪರಸ್ಪರ ಹೊಂದಾಣಿಕೆ ಸಹಬಾಳ್ವೆಗಳು ಮತಭೇದವನ್ನು ಇಲ್ಲದಂತಾಗಿಸುತ್ತವಲ್ಲ ..??!! ಎಂದು ಯೋಚಿಸುತ್ತಾ ಸಲೀಂ ಫೈಲ್ ನ ಪುಟಗಳನ್ನು ತಿರುವಿದ.

ಆತಂಕ....

ನಮ್ಮದು ಒಂದು ಹೆಸರಾಂತ ಕುಟುಂಬ ಎಲ್ಲ ಸದಸ್ಯರೂ ಒಂದಲ್ಲೊಂದು ಸಾಧನೆ ಮಾಡಿದವರು..ಹತ್ತು ಕುಟುಂಬಗಳಲ್ಲಿ ನಮ್ಮ ಕುಟುಂಬ ಅದರಲ್ಲಿ ನಾನು ಅಂದ್ರೆ ನನ್ನ ಸುತ್ತ ಮುತ್ತಣ ಮತ್ತೆ ಕಾಲೇಜಿನ ಹುಡ್ಗೀರೆಲ್ಲಾ ನನ್ನ ಹೃತಿಕ್ ರೋಶನ್ ನೋಡೋ ಹಾಗೆ ಕಣ್ಣಲ್ಲೇ ಆರಾಧಿಸೊರು...ನಮ್ಮ ಕಸಿನ್ ಗಳಿಗೆ ನನ್ನ ಕಂಡ್ರೆ ಹೊಟ್ಟೆ ಕಿಚ್ಚು...ನನ್ನದೂ ಕಟ್ಟುಮಸ್ತು ದೇಹ ನನ್ನ ಸ್ವಿಮ್ಮಿಂಗ ಸ್ಟೈಲಿಗೂ ಮಾರುಹೋಗ್ದೇ ಇರೋರೇ ಇಲ್ಲ...ಅದಕ್ಕೆ ನನ್ನ ಕಟ್ಟುಮಸ್ತು ದೇಹ ಸಾಥ್ ನೀಡಿತ್ತು ಅಂದ್ರೆ ತಪ್ಪಲ್ಲ....



ಆ ದಿನ ಪ್ರತಿವರ್ಷ ದಂತೆ ನಡೆಯೋ ಈಜು ಸ್ಪರ್ಧೆಯ ಫೈನಲ್ ನಡೆಯುವ ದಿನ...ಪೂರ್ತಿ ಕೊಳ ಸಜ್ಜುಗೊಳಿಸಲಾಗಿತ್ತು ...ಹಲವಾರು ಸಹ ಈಜುಗಾರ್ತಿಯರೂ ಇದ್ದರು..ಪಕ್ಕದ ಕೊಳದಲ್ಲಿ.. (ಕೆಲವರಂತೂ ನನ್ನ ಮೆಚ್ಚಿಸಲೆಂದೇ..ಮೈಮಾಟ ಎದ್ದು ಕಾಣೋ ಹಾಗೇ ಕೊಳದಲ್ಲೇ ಇಜಾಡ್ತಾ..ನನ್ನ ಗಮನ ಸೆಳೀತಿದ್ದುದು ಈಗ್ಲೂ ನೆನಪಿಸಿಕೊಂಡ್ರೆ...ಏಹ್..!! ಪರ್ವಾಯಿಲ್ಲ ಕಣಯ್ಯ ..ನೀನು..ಒಳ್ಳೆ ಫ್ಯಾನ್ ಫಾಲೋಯಿಂಗ್ ಇದೆ ನಿನಗೆ..ಅಂತ ನನ್ ಬೆನ್ನ ನಾನೇ ತಟ್ಕೊಂಡಿದ್ದೂ ಉಂಟು...ಹಹಹ).


ಅಂದಹಾಗೆ ಮರೆತಿದ್ದೆ ಹೇಳೋದು...ನನ್ನ ಸ್ನೇಹಿತರೇ ಏಕೆ..ಹುಡ್ಗೀರೂ..ನನ್ನ "ಲವ್ಲಿ ಬಾಸ್" ಅಂತಾನೇ ಕರೀತಿದ್ದುದು....


ಸರಿ ಸ್ಪರ್ಧೆ ಶುರು ಆಯ್ತು ...ಎಲ್ಲರಿಗೂ ಗೊತ್ತಿತ್ತು ಸ್ಪರ್ಧೆ ಹೆಸರಿಗೆ ಮಾತ್ರ...ಗೆಲುವು.."ಲವ್ಲಿ ಬಾಸ್" ದೇ.. ಅಂತ....ನನಗೆ ಯಾಕೋ ಇದು ಒಂದು ತರಹ ನಿರಾಸೆ ಮೂಡಿಸಿತ್ತು.."ಅಲ್ಲಾ..ಇದೊಂದು ಸ್ಪರ್ಧೆನಾ...? ಥ್ರಿಲ್ ಇಲ್ದೇ ಇರೋ ಸ್ಪರ್ಧೆ..ಸರ್ಧೆನೇ ಅಲ್ಲ.." ಅನ್ನಿಸಿತ್ತು...


ಆದ್ರೂ ಎಲ್ಲ ಹುಡ್ಗೀರನ್ನ ಇನ್ನಷ್ಟು 'ದಿವಾನ' ಮಾಡೋ ಚಾನ್ಸು ನಾನು ಬಿಡ್ತೀನಾ...ವೈಯಕ್ತಿಕ ದಾಖಲೆ ಮಾಡೋಣ ಅನ್ನಿಸಿ...ರೆಡಿಯಾದೆ.....


ಆಗ ಸ್ಪರ್ಧಿಗಳ ಹೆಸ್ರು ಕರೆದ್ರು.... ಸಿಲ್ವಸ್ಟರ್ ಉರ್ಫ್ "ಲವ್ಲಿ ಬಾಸ್" ಎಂದಾಗ ಹರ್ಷೋದ್ಗಾರ ಮುಗಿಲು ಮುಟ್ಟಿತ್ತು...ಕಡೆಯ ಸ್ಪರ್ಧಿ ಬ್ರೇವ್ ಬ್ರೀಮ್ ಎಂದಾಗ ನನಗೆ ಸಿಕ್ಕಷ್ಟಲ್ಲದಿದ್ದರೂ ಒಳ್ಲೆಯ ಕರತಾಡನ ಗಿಟ್ಟಿಸಿದ ಆ ಕಡೆಯ ಲೇನಿನ ಸ್ಪರ್ಧಿ..ಯಾರಿದು..? ಎಂದು ನೋಡಿದಾಗ ಹದಿಹರೆಯದ "ಬ್ರೀಮ" ನ್ನು ನೋಡಿದ್ದೆ..... ’ಇವನೂ ಜೋರಿದ್ದಾನೆ’ ಎನಿಸಿತ್ತು ಮನದಲ್ಲೇ...


ನಾಲ್ಕು ಬಾರಿ ದಡ ತಲಪುವ ಇನ್ನೂರು ಮೀಟರ್ ಸ್ಪರ್ಧೆ...ಸರಿ...ಎಲ್ಲಾ ಅಣಿಯಾಯ್ತು...


ರೆಫರಿ..ಜೋರಾಗಿ...ಆನ್ ಯುವರ್ ಮಾರ್ಕ್ಸ್ ಗೆಟ್ ಸೆಟ್..ಎಂದು ಗನ್ ಶೂಟ್ ಮಾಡಿದ್ದೇ...ಜಿಗಿದಿದ್ದೆ ನೀರಿಗೆ...ಎಲ್ಲರೂ "ಉತ್ತಮ ಸ್ಟಾರ್ಟ್..ಉತ್ತಮ ಸ್ಟಾರ್ಟ್..ಕಮಾನ್ ಲವ್ಲಿಬಾಸ್" ಎನ್ನುತ್ತಾ ಹುರಿದುಂಬಿಸ್ತಾ ಇದ್ರು....ಇನ್ನೂ ಐದಾರು ಮೀಟರ್ ಅಂತರ ಇರುವಂತೆ ಮೊದಲ ಲ್ಯಾಪ್ ಮುಗಿಸಿ ಎರಡನೇ ಲ್ಯಾಪ್ ಗೆ ಹಿಂದಿರುಗಿದೆ....ಲೀಲಾಜಾಲವಾಗಿ..ಎರಡನೇದು...ಹಾಗೇ ಮೂರನೇದು ಮುಗಿಸಿ ತಿರುಗಿದಾಗಲೇ ಗೊತ್ತಾದದ್ದು ಬ್ರೀಮ್ ನನ್ನ ಸಮಕ್ಕೆ ಬಂದಿದ್ದ ಎಂದು..!!ಅರ್ಧ ದೂರ ಕ್ರಮಿಸಿದ್ದೆ..ಯಾಕೋ ..ವೀಕ್ ಆಗ್ತಾ ಇದ್ದೇನೆ ಎನಿಸಿತ್ತು...ಬ್ರೀಮ್ ಒಂದು ಕೈ ಅಳತೆ ನನ್ಗಿಂತ ಮುಂದಿದ್ದ..ಎಲ್ಲರೂ "ಕಮಾನ್ ಲವ್ಲಿ ಬಾಸ್..ಕಮಾನ್...ಏನಾಯ್ತು..??!! ..ಛೇ...ಹೋಯ್ತು..ಇಲ್ಲ ಆಗ್ತಿಲ್ಲ...ನನ್ನಿಂದ...ಸೋಲ್ತಾ ಇದೆ ಮೈಕೈ..ಕಡೆಗೆ ಅಂಚು ತಲುಪುವಾಗ..ಬ್ರೀಮ್ ಮೊದಲ ಸ್ಥಾನ ಮತ್ತು ಇಷ್ಟು ವರ್ಷ ಮೂರು ನಾಲ್ಕರ ಸ್ಥಾನ ಪಡೀತಿದ್ದ ಸಿಲ್ವಸ್...ಎರಡನೇ ಸ್ಥಾನ...ನನ್ನದು ಅವಮಾನ ತುಂಬುವ ಮೂರನೇ ಸ್ಥಾನ...!!!???






ಛೇ..ಈ ಕೊಳ ಬಾಯ್ಬಿಟ್ಟು ನನ್ನ ನುಂಗಬಾರದೇ ..ಎನಿಸುವಷ್ಟು ನಾಚಿಕೆಯಾಗಿತ್ತು... ಕೊಳದಲ್ಲೇ..ನಿಂತು ಅಜ್ಜನ ಕಡೆಗೆ ನೋಡಿದೆ...ಅಜ್ಜ ಮುಗುಳ್ನಗ್ತಿದ್ದ...!!!


ನನಗೆ ..ಅವಮಾನ...ಆಶ್ಚರ್ಯ...ಎಲ್ಲ ಒಟ್ಟಿಗೆ...ನನ್ನ ಎಲ್ಲ ಗೆಲುವಲ್ಲೂ ಬೀಗುತ್ತಿದ್ದ ನನ್ನಜ್ಜ ನಗುವುದೇ...ಛೇ.....


ಈ ಹೊತ್ತಿಗಾಗ್ಲೇ...ಛಾಂಪಿಯನ್ "ಬ್ರೀಮ್" ಅನ್ನು ಚಲುವೆಯರೆಲ್ಲಾ ಸುತ್ತುವರೆದಿದ್ದರು.. ನಾನು ವಿಕ್ಟರಿ ಸ್ಟಾಂಡನ ಮೇಲೂ ಮನಸ್ಸಿಲ್ಲದ ಮನಸಿಂದ ನಿಂತೆ..ಕಾಟಾಚಾರದಂತೆ ಪದಕ ಪಡೆದು..ಅಜ್ಜನನ್ನ ತಬ್ಬಿಕೊಂಡು ಅತ್ತೆ...ಈಗ್ಲೂ ಅಜ್ಜನ ಮುಗುಳ್ನಗು ಮಾಯವಾಗಿರಲಿಲ್ಲ.....


ಮನೆಯ ಕಡೆ ಹೋಗ್ತಾ...ಅಜ್ಜನ್ನ ಪ್ರಶ್ನಾರ್ಥಕವಾಗಿ ನೋಡಿದಾಗ.." ಲವ್ಲಿ ಬಾಸ್" ನೀನು ಬಾಸ್ ಹೋಗಿ ಬರೀ "ಲವ್ಲಿ" ಆಗೋ ಕಾಲ ಬರ್ತಿದೆ...ಅಂದ..


ನಾನು "ಏನಜ್ಜ ನೀನು ಹೇಳ್ತಿರೋದು...?" ಅಂದೆ..


"ಹೌದು...ನಿನಗೆ ಐದು ವರ್ಷ ತುಂಬಿತಲ್ಲಾ....? .ಕೆಲ ಬಾಸ್ ಜಾತಿಯ ಮೀನುಗಳು ೫-೬ ವರ್ಷ ತುಂಬುತ್ತಿದ್ದಂತೆ ಗಂಡು ಬಾಸ್ ಹೆಣ್ಣಾಗಿ ಮಾರ್ಪಡುವ ಸಮಯ ..ಆಗ ಶರೀರ ಕ್ರಿಯೆಯಲ್ಲಿ ವಿಚಿತ್ರ ಬದಲಾವಣೆಗಳು ಆಗಿ ಗಂಡು-ಹೆಣ್ಣಾಗುವ ಮಹತ್ತರ ಘಟ್ಟಮುಟ್ಟುತ್ತೇವೆ, ಆಗ ಹೀಗಾಗುತ್ತದೆ...ಎಲ್ಲ ಬಾಸ್ ಗಳಂತೆ ನೀನೂ ಈಗ ಹೆಣ್ಣಾಗುವ ಸಮಯ ಹತ್ತಿರವಾಯ್ತು...ಪರವಾಗಿಲ್ಲ ಬಿಡು ಬ್ರೇವ್ ಬ್ರೀಮ್ ನಿನಗೆ ಒಳ್ಳೆಯ ಜೋಡಿ ಆಗ್ತಾನೆ",,,,ಎನ್ನುತ್ತಾ ನನ್ನನ್ನು ಕೀಟಲೆ ಮಾಡುವಾಗ ನನ್ಗಾದ ನಾಚಿಕೆ ..ಓಹ್..ನಾನಾಗಲೇ ಹೆಣ್ಣಾಗಿಬಿಟ್ಟೆ ..ಎನಿಸತೊಡಗಿತ್ತು....ಬ್ರೇವ್ ಬ್ರೀಮ್ ನ ಕನಸೂ ಕಾಣತೊಡಗಿದೆ....






ಸ್ನೇಹಿತರೇ...ಮೀನುಗಳ ಕೆಲ ಜಾತಿಯಲ್ಲಿ ತಮ್ಮ ಜೀವನದ ಮೊದಲ ಘಟ್ಟ ಹೆಣ್ಣಾಗಿ ನಂತರ ಗಂಡಾಗಿ ಮಾರ್ಪಡುವುದು ಕಂಡುಬರುತ್ತದೆ ಇವುಗಳನ್ನು ದ್ವಿಲಿಂಗತೆ-ಅಥವಾ ಹರ್ಮಾಫ್ರೊಡೈಟಿಸಂ ಎನ್ನುತ್ತಾರೆ.. ಮತ್ತೆ ಕೆಲವು ಮೊದಲಿಗೆ ಗಂಡಾಗಿದ್ದು ನಂತರ ಹೆಣ್ಣಾಗುವ ಸ್ವಭಾವವನ್ನು ಹೊಂದಿರುತ್ತವೆ...ನಮ್ಮ ಕಥಾ ನಾಯಕ...ಏನು?..ನಾಯಕ ..ಅಂದೆನೇ...ಅಲ್ಲಲ್ಲ....ನಾಯಕಿ....ಛೇ...ಏನೋ ..ಒಂದು...,,ಲವ್ಲಿ ಬಾಸ್ ನಂತೆ...


ಎರಡೂ ಲಿಂಗಗಳು ಒಮ್ಮೆಲೇ ಒಂದೇ ಜೀವಿಯಲ್ಲಿ ಕಂಡುಬಂದರೆ ಅದನ್ನು ಏಕಕಾಲಿಕ ದ್ವಿಲಿಂಗಿಗಳು (simultaneous or synchronous hermophrodites) ಎಂದೂ...ಸರದಿಯ ಮೇಲೆ ಅಂದರ ಒಂದರ ನಂತರ ಒಂದು ಬಂದರೆ ಅದಕ್ಕೆ ಸರದಿ ದ್ವಿಲಿಂಗಿ (alternate hermophrodiism) ಎನ್ನಲಾಗುತ್ತೆ........


ಹೇಗಿತ್ತು...ಈ science information ..ಸೇರಿದ ಕಥೆ..ಆತಂಕಥೆ....???

ಹುಚ್ಮುಂಡೆ ಮದ್ವೆ..ಉಂಡವನೇ....

ಭಸ್ಮಾಸುರನ ಪವರ್ರು ಶಿವನಿಗೇ ಗೊತ್ತು

ಏನೋ..ಪಾಪ ಭಕ್ತ ಅಂದಿದ್ದೇ ವಿಪತ್ತು

ವರ ಕೊಟ್ಟ, ಬಂತು ಶಿವನ ಅಸ್ತಿತ್ವಕ್ಕೇ ಆಪತ್ತು

ಅದಕ್ಕೇ ನೋಡಿ ಬಿ.ಸಿ.ಸಿ.ಐಗೇ ಬಂದಿದೆ ಕುತ್ತು

ಐಪಿಎಲ್ ಅನ್ನೋ ಅಸುರ ಹುಟ್ಕೊಂಡ

ಹಣ, ಹೆಂಡ ಹುಡ್ಗೀರು, ಬೆಟ್ಟಿಂಗು ಉಂಡ

ಬೆಳೆದ ಅಗಾಧ..ಆಗಿ ಟೆಸ್ಟು-ಒಂಡೇಗೇ ಗಂಡ

ಜನಕ್ಕೆ, ಆಟ ಆಡೋರ್ಗೆ ಅನ್ನಿಸ್ತು ಬೇರೆಲ್ಲಾ ದಂಡ

ನಿಜವಾದ ಆಟ, ನಟರ ನಟನೆ ತೂರಿತ್ತು ಗಾಳಿಗೆ

ಸಿಕ್ಕಿಬಿದ್ರು, ಬೇರೇನೂ ಕಾಣ್ಲಿಲ್ಲ ಐಪಿಎಲ್ ದಾಳಿಗೆ

ಭಾವಿ ಇಂಜನೀಯರೊಬ್ಬ ಬಲಿಯಾದ ಆಸೆಗೆ

ಸಿಡಿಸಿದ್ರು ಬಾಂಬು.. ಸೆಮಿಫೈನಲ್ಲು ಬಾಂಬೆಗೆ

ಈಗ ನೋಡಿ ಮೋದಿ-ಐಪಿಎಲ್ ದೇ ಎಲ್ಲೆಲ್ಲೂ ಮೋಡಿ

ಬರ್ತಾರೆ ದುಡ್ಮಾಡೋಕೆ ವಿದೇಶದಿಂದ ಆಟ್ಗಾರ್ರು ಓಡಿ

ಟಿಕೆಟ್ ದುಡ್ಡು, ಪ್ರೇಕ್ಷಕರ ರಕ್ತ ಹರಿದೈತೆ ಕೋಡಿ

ಹುಚ್ಮುಂಡೆ ಮದ್ವೇಲಿ ಉಂಡವನೇ ಜಾಣ.. ಅದ್ಕೇ ಹೇಳೋದು ನೋಡಿ

ತಿಳಿ ನೀರು - ನಿರ್ಮಲ ಕೊಳ

ತಿಳಿ ನೀರು- ನಿರ್ಮಲ ಕೊಳ


ಮುಳುಗಿ ಏಳ್ತಾನೆ ಸೂರ್ಯಾನೂ


ತಾಳಲಾರದೆ ಬಿಸಿಲ ಝಳ


ಕೊಳದಲ್ಲಿ ಹತ್ತು ಹಲವು ಜಾತಿ


ಕೆಂಪು, ಹಳದಿ, ಹಸಿರು, ಕಪ್ಪು ಮೀನು



ದೊಡ್ಡದು ಚಿಕ್ಕದಕ್ಕೆ ಹೇಳ್ತು ಮೆದುವಾಗಿ


ನನ್ಪಾಡ್ಗೆ ನಾನಿರ್ತೀನಿ ಇರ್ಬೌದಲ್ಲ ನೀನೂ


ಆಮೆನೂ ಇತ್ತು ಅಲ್ಲೇ ವಾಸವಾಗಿ


ಮೊಸಳೇನೂ ಬರ್ತಿತ್ತು, ಹೋಗ್ತಿತ್ತು


ತಂಟೆಯಿಲ್ಲ ತಕರಾರಿಲ್ಲ ಎಲ್ಲಾ ಇದ್ವು ಹಾಯಾಗಿ



ಕೆಂಪು ಕಪ್ಪಿಗೆ ಹಲೋ ಅಂದ್ರೆ


ಹಳದಿ ಹಸಿರಿಗೆ ಚಲೋ ಅನ್ತಿತ್ತು ಆಟಕ್ಕೆ


ಅವರವರ ಲೋಕದಲ್ಲಿ ಹಾಯಾಗಿದ್ವು


ಗುರಿಯಾಗದೇ ಯಾವುದೇ ಕಾಟಕ್ಕೆ



ಆಗೊಮ್ಮೆ ಆಗ್ಬಾರ್ದು ಆಗೇ ಹೋಯ್ತು


ಸೂರ್ಯ ತನ್ನ ಬಿಸಿಲಲ್ಲಿ ತಾನೇ ಸುಡ್ತು


ಕಪ್ಪು ಮೋಡ ಆಕಾಶದಲ್ಲಿ ಗುಡುಗು ಸಿಡ್ಲು


ಗಾಳಿ ಮಳೆಗೆ ಹಾರಿದ್ವು ಎಷ್ಟೋ ಗುಡ್ಲು


ಅಲ್ಲೆಲ್ಲಿಂದ್ಲೋ ಹರ್ದು ಬಂತು ಅಪಾರ ನೀರು


ಬಗ್ಗಡ ಆಯ್ತು ತಿಳಿಯಾಗಿದ್ದ ಕೊಳದ ನೀರು

ಒಂದ್ಗುಟ್ಕು ಆಕ್ಕೊಂಡ್ರೆ ಬ್ಲಾಗು

ನನ್ಪಾಡಿಗ್ ನಾನಿದ್ದೆ


ಸಂಸೋದ್ನೆ ಮಾಡ್ತಿದ್ದೆ


ಅದೂ ಇದೂ ಬರೀತಿದ್ದೆ


ಕವ್ನಾಂತ ಒಂದಿಷ್ಟು ಗೀಚ್ತಿದ್ದೆ


ನಾಟ್ಕದ್ದೂ ಗೀಳು ಇದ್ದದ್ದೇ


ಬಾಳ್ವೇಗೆ ಸಂಸೋದ್ನೆ


ಉಲ್ಲಾಸ್ಕೇ ಗೀಚೋದ್ನೆ


ಮಾಡ್ಕಂಡ್ ನನ್ಲೋಕ್ದಾಗೆ


ಅಕ್ಕಿಯಂಗೆ ಇರ್ತಿದ್ದೆ


ಗೀಚಿದ್ದು ಪೇಪರ್ನ್ನಾಗಿಡ್ತಿದ್ದೆ


ಆವಾಗಾವಾಗ ಬರ್ದಿದ್ದು ನಾನೇ ಓದ್ತಿದ್ದೆ


ನನ್ನ್ ಬೆನ್ನ ನಾನೇ ತಟ್ತಿದ್ದೆ.




ಒಂದ್ಸರ್ತಿ ‘ಮನ್ಸು' ಅಚ್ಬುಡ್ತು


ಬ್ಲಾಗ್ಲೋಕಕ್ಕೆ ನನ್ನ ತಂದ್ಬುಡ್ತು


ಮೊದ್ಮೊದ್ಲು ಒಂದೊಂದು


ಆಮೇಲಾಮ್ಯಾಕೆ ಹತ್ತೊಂದು


ಸ್ನೇಯಿತ್ರು ಅತ್ಸ್ ಬುಟ್ರು ಅಟ್ಟ..


ಬಲ್ ಬರೀತೀ ಅಂದ್ಬುಟ್ರು


ನಾನೂ ಅತ್ತೇ ಬುಟ್ಟೆ..ಅಟ್ಟ


ಮುಟ್ತಾ ಓದೆ ಒಂದೊಂದೇ ಘಟ್ಟ


ಈಗ ಬ್ಲಾಗ್ ಅಂದ್ರೆ ಒಂದ್ರೀತಿ


ಕುಡ್ಕಂಡoಗೆ ಕಂಠ್ಮಟ್ಟ


ಇಂಗೇ ಬಂದ್ಬುಟ್ರೆ ಮೂಡು


ಮೂಡ್ತಾದೆ ಬರಹ್ದಾಗೆ ಕೋಡು


ಪದ್ಗೋಳ್ ಹಿಡೀತಾವೆ ಜಾಡು


ಸೇರೇ ಬಿಡ್ತಾವೆ ಬ್ಲಾಗನ್ನೋ ಬೀಡು.


ಎಂಡ ಎಂಡ್ತಿ ಆಗೋಯ್ತು ಅಳ್ತು


ಬ್ಲಾಗ್ ಅನ್ನೋ ಚಟಕ್ಕೆ


ಜಲನಯನ ಬೀಳ್ತು.