Sunday, October 10, 2021

ಬಾಲ್ಯ (Bachpan)

 

(Foto: Udayavani Webpages)

....................ಬಾಲ್ಯ......................

ಮರೆಯಲೆಂತು ಕಳೆದ ಆ ದಿನಗಳ, ಕ್ಷಣಗಳ

ಕೆಸರಲ್ಲಿ ಕುಣಿತ, ಮಳೆಯಹನಿಯಲ್ಲಿ ನೆನೆತ

ತೋಪಿನಿಂದ ಕದಿವಾಟ, ಮಾವಿನ ಮಿಟ್ಕರಿತ

ಗಡಿಗೆಗೆ ಗುರಿ, ನೀರಹೊತ್ತ ನೀರೆಗೆ ಕೊಟ್ಟ ಕಾಟ

ಈಗೆಲ್ಲಿಯ ತೋಪು, ನೀರ್ಬಾವಿ ನೀರೆಯರ ನೋಟ

ಗುಬ್ಬಿಯ ಬಿಡಿ, ಕಂಡಲ್ಲಿ ಕಂಡ ಕಾಗೆಯನೂ ಕಾಣೆ

ಚಾಲಾಕಿ ಬಿಡಿ, ಅಂಗಳದಿ ನೀರಹೂಜಿನೇ ಕಾಣೆ

ಕರ್ಪೊಗೆ, ಬರಿಧೂಳು ಒಮ್ಮೆ ನೀಲಿಯಿದ್ದ ಗಗನದಿ

ಮಳೆಹನಿ ಬಿಡಿ, ಮೋಡವ ಕಂಡ ನೆನಪಿಲ್ಲ ಮನದಿ

ಆ ಗಿಡ ಮರ ಹಸಿರುಟ್ಟ ನೆಲ, ಓಹ್ ತಣ್ಣನೆ ಪವನ

ಹೋಗಬೇಕಿದೆ ಎನಗೆ, ಮರಳಿಸುವಿರಾ ನನಗೆ ಆ ದಿನ..?


BACHPAN

Oh din bhi kyaa din the? bhulaa na sakenge

Keechad mei pudhakna, bearish mei behekna

Amraayi se churaake aamki mitkaari bharnaa

Matki todnaa, panghat pe choriyon ko chedna

Ab kahaan ki amraayi, kahaan hain khatte aam!

Kahaan gayi keechad bhari gaaon ki galiyaan

Matki ab nahi, chutki ki patki mei hai band paani

Chidiya to door kavva bhee nahin nazar aataa

Hoshiyaaree tho thab, jab kooza nazar aataa

Dhuvaan aur dhool se bharaa kabhi neela gagan

Baadal ko dekhe yug beete, barsaatein tho door

Oh ped paudhe, oh hariyaali aur jhoomta saavan

Laut jaana chaahte hain, Koi lautaa do bachpan

 

........................ಬಚ್ಪನ್......................

ಓಹ್ ದಿನ್ ಭಿ ಕ್ಯಾ ದಿನ್ ಥೆ ಭುಲಾ ಸಕೆಂಗೆ

ಕೀಚಡ್ ಮೆಂ ಪುಧಕ್ನ, ಬಾರಿಶ್ ಮೆಂ ಬೆಹೆಕ್ನಾ

ಆಮ್ರಾಯಿ ಸೆ ಚುರಾಕೆ ಆಮ್ಕಿ ಮಿತ್ಕಾರಿ ಭರ್ನಾ

ಮಟ್ಕಿ ತೋಡ್ನಾ, ಪನ್ಘಟ್ ಪೆ ಛೋರಿಯೋಂಕೊ ಛೇಡನಾ

ಆಬ್ ಕಹಾನ್ ಕಿ ಅಮ್ರಾಯಿ, ಕಹಾಂ ಹೈನ್ ಖಟ್ಟೆಆಮ್?

ಕಹಾಂ ಗಯಿ ಕೀಚಡ್ ಭರಿ ಗಾಂವ್ ಕಿ ಗಲಿಯಾಂ?

ಮಟ್ಕಿ ಅಬ್ ನಹಿ, ಚುಟ್ಕಿ ಕಿ ಫಟ್ಕಿ ಮೆಂ ಹೈ ಬಂದ್ ಪಾನಿ

ಚಿಡಿಯಾ ತೊ ದೂರ್ ಕವ್ವಾ ಭೀ ನಜ಼ರ್ ನಹೀಂ ಆತಾ

ಹೋಶಿಯಾರೀ ತೊ ತಬ್ ಜಬ್ ಕೂಜ಼ ನಜ಼ರ್ ಆತಾ

ಧುಂವಾ ಔರ್ ಧೂಲ್ ಸೆ ಭರಾ ಹೈ ಕಭೀ ಥಾ ನೀಲ ಗಗನ್

ಬರ್ಸಾತ್ ತೊ ದೂರ್ ಬಾದಲ್ ಕೊ ದೆಖೆ ಯುಗ್ ಬೀತೆ

ಓಹ್ ಪೇಢ್ ಪೌಧೆ, ಒಹ್ ಹರಿಯಾಲಿ ಔರ್ ಝೂಮ್ತಾ ಸಾವನ್

ಲೌಟ್ ಜಾನಾ ಚಾಹ್ತೆ ಹೈನ್, ಕೋಯೀ ಲೌಟಾ ದೊ ಬಚ್ಪನ್

 



Monday, April 19, 2021

ಪದ್ಮಶ್ರೀ ಪ್ರೊ. ಜಿ ವೆಂಕಟಸುಬ್ಬಯ್ಯನವರಿಗೆ -ಪದನಮನ

 








ನಾಡೋಜ, ಪದ್ಮಶ್ರೀ ಪ್ರೊ. ಗಂಜಾಂ ವೆಂಕಟಸುಬ್ಬಯ್ಯ – ಪದಬ್ರಹ್ಮರಿಗೆ ಪದನಮನ

ಲೇಖನ: ಡಾ. ಆಜಾದ್ ಐ.ಎಸ್.

(ಆಧಾರ- ಡಾ ಎಸ್. ಶ್ರೀಕಂಠ ಶಾಸ್ತ್ರಿಯವರ ಜಾಲತಾಣ)

ಮಂಡ್ಯ-ಮೇಲುಕೋಟೆ ನಡುವೆ ಬರುವ ಪುಟ್ಟಗ್ರಾಮ ಮುದಗೊಂದೂರಿನ ಪೂರ್ವಜ ಹಿನ್ನೆಲೆಯ “ಜೀವಿ” ಎಂದೇ ಪ್ರಖ್ಯಾತರಾದ ನಾಡೋಜ, ಪದ್ಮಶ್ರೀ ಪ್ರೊ. ವೆಂಕಟಸುಬ್ಬಯ್ಯನವರು ಜನಿಸಿದ್ದು 1912 ಆಗಸ್ಟ್ 23 ರಂದು  ಕಾವೇರಿ ತಟದ ಕಾಯ್ಗೊನಹಳ್ಳಿ ಎಂಬ ಊರಿನಲ್ಲಿ. ತಂದೆ ತಿಮ್ಮಣ್ಣಯ್ಯ ಮತ್ತು ತಾಯಿ ಸುಬ್ಬಮ್ಮರ ಎಂಟು ಮಂದಿ ಮಕ್ಕಳಲ್ಲಿ ಜೀವಿಯವರು ಎರಡನೇಯವರು. ತಂದೆಯವರೊಂದಿಗೆ ಕಾವೇರಿಯಿಂದ ನೀರುತರಲು ಹೋಗುತ್ತಿದ್ದಾಗ “ಅಮರಕೋಶ” ಪಠಣ ಮಾಡುತ್ತಿದ್ದರಂತೆ ಜೀವಿ. ಕನ್ನಡ ಅಧ್ಯಾಪಕರಾಗಿದ್ದ ತಿಮ್ಮಣ್ಣಯ್ಯನವರ ಜೊತೆ ಸ್ವಾಭಾವಿಕವಾಗಿ ಅವರು ವರ್ಗವಾಗಿ ಹೋದಲ್ಲೆಲ್ಲಾ ಜೀವಿಯವರೂ ಹೋಗುತ್ತಿದರಿಂದ ಬನ್ನೂರು ಮತ್ತು ಮಧುಗಿರಿ ಇವರಿಗೆ ಪರಿಚಿತ ಸ್ಥಳಗಳಾಗಿದ್ದವು. ಬಾಲ್ಯದಿಂದಲೂ ಪಠ್ಯದ ಜೊತೆಗೆ ಪಠ್ಯೇತರ ಚಟುವಟಿಕೆಗಳಲ್ಲೂ ಮುಂಚೂಣಿಯಲ್ಲಿರುತ್ತಿದ್ದ ಜೀವಿಯವರು ಪರ್ವತಾರೋಹಣ, ಕ್ರೀಡೆಗಳಲ್ಲಿ ಮುಂದಿದ್ದರಂತೆ. ಮುಂದೊಮ್ಮೆ ಇವರ ಈ ಬಹುರಂಗ ಪ್ರತಿಭೆಯನ್ನು ಗುರಿತಿಸಿದ ಸರ್ವಪಲ್ಲಿ ಡಾ ರಾಧಾಕೃಷ್ಣನ್ ರವರು ಬೆನ್ನು ತಟ್ಟಿದ್ದರಂತೆ. 1927 ರಲ್ಲಿ ಮಧುಗಿರಿಯಲ್ಲಿ ಭಾಷಣ ಮಾಡಿದ ಮಹಾತ್ಮ ಗಾಂಧಿಯವರಿಂದ ಬಹಳವಾಗಿ ಪ್ರಭಾವಿತರಾಗಿದ್ದರಂತೆ ಜೀವಿ. ಮಧುಗಿರಿಯಲ್ಲೇ ಅವರು ಮೊದಲಿಗೆ ಭೇಟಿಯಾಗಿದ್ದು -ಕಥಾ ಸಾಹಿತಿ ಪ್ರೊ.ಮಾಸ್ತಿಯವರನ್ನು. ಜೀವಿಯವರ ಸಹಪಾಠಿಗಳಲ್ಲಿ ಕೆ ಎಸ್ ನಾರಾಯಣಸ್ವಾಮಿ ಮತ್ತು ರಿಸರ್ವ್ ಬ್ಯಾಂಕ್ ನ ಅತ್ಯುನ್ನತ ಹುದ್ದೆಗೇರಿದ ಹಾಗೂ ವಿಶ್ವಬ್ಯಾಂಕ್ ಹುದ್ದೆಯನ್ನೂ ಅಲಂಕರಿಸಿದ ಪ್ರಸಿದ್ಧ ಅರ್ಥ ಶಾಸ್ತ್ರಿ ಶ್ರೀ ಕೆ.ಎಸ್. ಕೃಷ್ಣಸ್ವಾಮಿಯವರು ಪ್ರಮುಖರು. ಅಂತಿಮವಾಗಿ ಮೈಸೂರಿನಲ್ಲಿ ನೆಲೆಯೂರಿತ್ತು ತಿಮ್ಮಣ್ಣಯ್ಯ ಕುಟುಂಬ. 1932 ರಲ್ಲಿ ಯುವರಾಜ್ ಕಾಲೇಜಿಗೆ ದಾಖಲಾದರು ಜೀವಿ. ಇತಿಹಾಸ, ಸಂಸ್ಕೃತ ಮತ್ತು ತತ್ವಶಾಸ್ತ್ರ ಇವರ ಪ್ರಮುಖ ಅಧ್ಯಯನಾ ವಿಷಯಗಳಾಗಿದ್ದವು. ಅಂದಿನ ಇವರ ಗುರುಗಳು  ನಾ.ಕಸ್ತೂರಿ, ಕುವೆಂಪು ಮತ್ತು ಎಮ್ ಎ ವೆಂಕಟರಾವ್.

ಕನ್ನಡದ ಬಗ್ಗೆ ಇವರ ಅಭಿಮಾನ ಆಸಕ್ತಿಗಳು ಮೂಡಲು ಕನ್ನಡ ಅಧ್ಯಾಪಕರಾಗಿದ್ದ ಅವರ ತಂದೆಯವ್ರೇ ಮೊದಲ ಪ್ರೇರಣೆ. ಇದಕ್ಕೆ ನಂತರ ನೀರೆರೆದು ಪೋಷಿಸಿದವರು ಕುವೆಂಪುರವರು. ಬಿ.ಎ. ಹಾನರ್ಸ್ನಲ್ಲಿ 1933 ರಲ್ಲಿ ಅತ್ಯುತ್ತಮ ದರ್ಜೆಯಲ್ಲಿ ತೇರ್ಗಡೆಯಾದ ಜೀವಿ ಹಲವು ಪಠ್ಯ ಮತ್ತು ಪಠ್ಯೇತರ ವಿಷಗಳಲ್ಲಿ ಪದಕಗಳನ್ನು ಗಳಿಸಿದ್ದರು. ತಮ್ಮ ಬಿ.ಎ. ತರಗತಿಗಳಲ್ಲಿ ಟಿ.ಎಸ್. ವೆಂಕಣ್ಣಯ್ಯ ರವರಿಂದ ಪಂಪಭಾರತ, ಡಿ ಎಲ್. ನರಸಿಂಹಾಚಾರ್ ರಿಂದ ಸಂಪಾದಕೀಯ ಶಾಸ್ತ್ರ, ತೀನಂ ಶ್ರೀಕಂಠಯ್ಯರವರಿಂದ ಕಾವ್ಯ ಮೀಮಾಂಸೆ, ಮತ್ತು ಎಸ್ ಶ್ರೀಕಂಠ ಶಾಸ್ತ್ರಿಗಳಿಂದ ಕರ್ನಾಟಕ ಇತಿಹಾಸ ವಿಷಯಗಳನ್ನು ಅರಿತುಕೊಂಡರು. ಇವರ ವಿದ್ಯಾ ಸಾಧನೆಯಲ್ಲಿ ಅರ್ಧ ಅಂಕ ಕಡಿಮೆ ಬಂದುದರಿಂದ ವಿದ್ಯಾರ್ಥಿ ವೇತನದಿಂದ ವಂಚಿತರಾದರಂತೆ. ಆದರೆ ಇವರ ಬಹುಮುಖ ಪ್ರತಿಭೆಯನ್ನು ಗುರುತಿಸಿದ ಮಹಾರಾಜಾ ಕಾಲೇಜಿನ ಪ್ರಾಂಶುಪಾಲರಾದ ಸಿ.ಜೆ. ರೋಲ್ ಜೀವಿಯವರಿಗೆ ಸ್ಕಾಲರ್ಶಿಪ್ ಕೊಡಿಸಿದರಂತೆ.

1936 ರಲ್ಲಿ ಎಂ ಎ, ಗೆ ಸೇರಿದ ಜೀವಿಯವರ ತಿದ್ದು ತೀಡುಗಳಿಗೆ ಕಾರಣರಾದವರು ಕನ್ನಡ ಭಾಷಾ ದಿಗ್ಗಜರಾದ ಬಿ.ಎಂ.ಶ್ರೀ, ಟಿಎಸ್ ವೆಂಕಣ್ಣಯ್ಯ ಹಾಗೂ ಬೆನಗಲ್ ರಾಮರಾವ್. ಎಂಎ. ಪದವಿಯಲ್ಲಿ ಸ್ವರ್ಣಪದಕದೊಂದಿಗೆ ಉತ್ತೀರಣರಾದರು ಜೀವಿ. 1937 ಘಟಿಕೋತ್ಸವದ ಮುಖ್ಯ ಅತಿಥಿಗಳಾಗಿದ್ದವರು ನಾಲ್ಮಡಿ ಕೃಷ್ಣರಾಜ ಒಡೆಯರ್ ಮತ್ತು ಕಗ್ಗ ಕವಿ ಡಿವಿಜಿಯವರು. ಘಟಿಕೋತ್ಸವದ ಒಂದು ಘಟನೆ ಜೀವಿಯವರಿಗೆ ಸಂಭಾವಿತ ನಡೆ ಹೇಗಿರಬೇಕೆಂಬ ಮಹತ್ತರ ಪಾಠ ಕಲಿಸಿತಂತೆ. ಅಂದು ಮುಂದಿನ ಸಾಲಲ್ಲಿ ಕುಳಿತಿದ್ದ ಯುವ ಜೀವಿಯವರು ಕಾಲಮೇಲೆ ಕಾಲು ಹಾಕಿದ್ದನ್ನು ಕಂಡ ಡಿವಿಜಿ ಯವರು ಸಂಜ್ಜೆಮಾಡಿ -ಮಹಾರಾಜರ ಎದುರು ಹಾಗೆ ಕೂರುವುದು ಅವಮರ್ಯಾದೆ ಎನ್ನುವಂತೆ ಕಣ್ಣಲ್ಲೇ ಸೂಚಿಸಿದರಂತೆ.

ಇದೇ ವರ್ಷ ಮಂಡ್ಯದಲ್ಲಿ ಶ್ರೀಮತಿ ಲಕ್ಷ್ಮಿಯರು ಜೀವಿಯವರ ಗೃಹಲಕ್ಷ್ಮಿಯಾದುದಂತೆ. ಮನೆಪಾಠ ಮಾಡುತ್ತಾ ಜೀವನ ಪ್ರಾರಂಭಿಸಿದ ಜೀವಿಯವರಿಗೆ ಆಗಿನ ಮಂಡ್ಯದ ಕಮೀಷನರ್ ಆಗಿದ್ದ ಎಮ್.ಜೆ. ಮೇಖ್ರಿಯವರು ಅಧ್ಯಾಪಕರಾಗಿ ಸೇರಲು ಕೋರಿಕೊಂಡರಂತೆ. ಆಶ್ಚರ್ಯವೆಂದರೆ ಕನ್ನಡ ನಿಘಂಟು ಬ್ರಹ್ಮ ಎಂದು ಹೆಸರು ಪಡೆಯಲಿದ್ದ ಜೀವಿ ಪ್ರಾರಂಭಿಸಿದ್ದು ಆಂಗ್ಲ ಬೋಧಕರಾಗಿ, ತಿಂಗಳಿಗೆ 35 ರೂಪಾಯಿಯ ಸಂಬಳದ ಮೇಲೆ. ಬದುಕ ನಡೆಸಲು ಅನಿವಾರ್ಯವೆಂಬಂತೆ ಆ ಹುದ್ದೆಯನ್ನು ಒಪ್ಪಿಕೊಂಡರಂತೆ. ಜೀವಿಯವರು ಜೀವಗಂಡಾಂತರವೊಂದರಿಂದ ಪಾರಾದ ಘಟನೆಯನ್ನು ಡಾ ಶ್ರೀಕಂಠಶಾಸ್ತ್ರಿಗಳು ಹೀಗೆ ವಿವರಿಸುತ್ತಾರೆ.

1941 ರಲ್ಲಿ ದೊಡ್ಡಬಳ್ಳಾಪುರದಲ್ಲಿ ಸ್ಕೌಟ್ ಕ್ಯಾಂಪಿನಲ್ಲಿ ಅಧ್ಯಾಪಕ ವೃಂದದ ಮುಂದಾಳತ್ವ ವಹಿಸಿದ್ದ ಜೀವಿಯವರು ಒಂದು ದಿನ ಬೆಳಗ್ಗೆ ಈಜಲು ಹೋಗಿದ್ದರಂತೆ. ನೀರು ತುಂಬಾ ತಣ್ಣಗಿದ್ದುದರಿಂದ ಕಾಲಿನ ಖಂಡಜಡತೆಯಿಂದಾಗಿ ಮುಳುಗುವಂತಾಗಿದ್ದರಂತೆ, ಆಗ ಅವರ ಸ್ನೇಹಿತರಾಗಿದ್ದ ಅಪ್ಪಾಜಿಗೌಡ ಅವರನ್ನು ದಡಕ್ಕೆ ತಲಿಪಿಸಿದ್ದರಂತೆ.

ಬೆಂಗಳೂರಿನ ವಿಜಯಾ ಸಂಜೆ ಕಾಲೇಜಿನ ಅಧ್ಯಾಪಕ, ಪ್ರಾಧ್ಯಾಪಕ ಮತ್ತು ಪ್ರಾಂಶುಪಾಲ ಹುದ್ದೆಗಳನ್ನು ಅಲಂಕರಿಸಿದ್ದ ಜೀವಿಯವರು “ಉತ್ಸಾಹ” ಎಂಬ ವಿದ್ಯಾರ್ಥಿ ಪತ್ರಿಕೆಯನ್ನು ಪ್ರಾರಂಭಿಸಿದ್ದರಂತೆ. ಅಧ್ಯಾಪಕ ವೃತ್ತಿಯ ಜೊತೆಗೆ ಸಮಾಜ ಕಲ್ಯಾಣಪರ ಕಾಳಜಿಯೂ ಜೀವಿಯವರಲ್ಲಿತ್ತು ಎನ್ನುವುದಕ್ಕೆ ಉದಾಹರಣೆಯಾಗಿ ಜಯನಗರದ “ಜಯರಾಂ ಸೇವಾ ಮಂಡಳಿ” ಸಭಾಂಗಣದ ನಿರ್ಮಾಣ ಮತ್ತು ನಿರ್ವಹಣೆಗೆ ಕಾರಣರಾದರಂತೆ.

ಕನ್ನಡದ ಸಮಗ್ರ ಪದಕೋಶವಾಗಿ ಕಿಟ್ಟೆಲ್ ರವರ ಕನ್ನಡ ನಿಘಂಟು ಹೊರಬಂದ  100 ವರ್ಷಗಳ ನಂತರ ಕಾಕತಾಳೀಯವೆಂಬಂತೆ ಜೀವಿಯವರ ಮೊದಲ ಕನ್ನಡ ನಿಘಂಟು “ಕನ್ನಡ ನಿಘಂಟು ಶಾಸ್ತ್ರ ಪರಿಚಯ” 1993-94 ರಲ್ಲಿ ಲೋಕಾರ್ಪಣೆಯಾಯಿತು. ಕನ್ನಡ ಸಾಹಿತ್ಯ ಪರಿಷತ್ತಿನ ಅತಿ ಕಿರಿಯ ವಯಸ್ಸಿನ ಅಧ್ಯಕ್ಷರಾದ ಕೀರ್ತಿ ಜೀವಿಯವರದ್ದು. ಕನ್ನಡ-ಕನ್ನಡ ನಿಘಂಟು ಪರಿಯೋಜನೆಯ ಸಂಪಾದರಾಗಿಯೂ ಜೀವಿಯವರು ಸೇವೆ ಸಲ್ಲಿಸಿದ್ದಾರೆ. “ಇಗೋ ಕನ್ನಡ,” “ಕನ್ನಡ ಕ್ಲಿಷ್ಟಪದ ಕೋಶ” ಜೀವಿಯವರ ಪದಸಿರಿಯ ಕೊಡುಗೆಗಳಲ್ಲಿ ಪ್ರಮುಖವಾದುವು. ಲೆಕ್ಕವಿಲ್ಲದಷ್ಟು ಕೃತಿಗಳ ಕರ್ತೃವಾದ ಜೀವಿಯವರು ಹಲವಾರು ಕೃತಿಗಳ ಸಂಪಾದಕರೂ ಆಗಿದ್ದಾರೆ. ಅವುಗಳಲ್ಲಿ “ಕನ್ನಡ ರತ್ನ ಪರಿಚಯ” “ನಳ ಚಂಪು ಸಂಗ್ರಹ”, “ಅಕ್ರೂರ ಚರಿತ್ರೆಯ ಸಂಗ್ರಹ”, “ಶ್ರೀರಾಮ ಸಂಭವ”, “ಹೊಯ್ಸಳ ಕರ್ನಾಟಕ ರಾಜ್ಯೋತ್ಸವ ಸಂಪುಟ” “ರಾಮಾಯಣ ಅಂತರಂಗ”, “ಹೊಯ್ಸಳ ಮಾಲೆ” ಪ್ರಮುಖವಾದುವು.

ಜೀವಿಯವರ ಪ್ರತಿಭೆಯನ್ನರಸಿ ಬಂದ ಪ್ರಶಸ್ತಿ ಪುರಸ್ಕಾರಗಳಿಗೆ ಲೆಕ್ಕವಿಲ್ಲ. ಚಾರುಕೀರ್ತಿ ಭಟ್ಟಾರಕ ಸ್ವಾಮೀಜಿಯವರಿಂದ “ವಿದ್ಯಾಲಂಕಾರ” ಪ್ರಶಸ್ತಿ, 60 ನೇ ವಯಸಿನಲ್ಲಿ ನೀಡಲಾದ “ಸಾಹಿತ್ಯಜೀವಿ” ಪುರಸ್ಕಾರ, ಕರ್ನಾಟಕ ರಾಜ್ಯೋತ್ಸವ ಪ್ರಶಸ್ತಿ, ಸೇಡಿಯಾಪು ಪ್ರಶಸ್ತಿ, ಶಂಭ ಪ್ರಶಸ್ತಿ, ಶಿವರಾಮ ಕಾರಂತ ಪ್ರಶಸ್ತಿ, ಮಾಸ್ತಿ, ಗೋರೂರು, ಅನಕೃ ಪ್ರಶಸ್ತಿಗಳು, ಕನ್ನಡ ಸಾಹಿತ್ಯ ಅಕಾಡಮಿ ಪ್ರಶಸ್ತಿ, ಆರ್ಯಭಟ ಪ್ರಶಸ್ತಿ, ನಾಡೋಜ ಪ್ರಶಸ್ತಿ, ರಾಣಿಚನ್ನಮ್ಮ ವಿಶ್ವವಿದ್ಯಾನಿಲಯದ ಗೌರವ ಡಾಕಟರೇಟ್, 77 ನೇ ಕನ್ನಡ ಸಾಹಿತ್ಯ ಸಮ್ಮೇಳನದ ಅಧ್ಯಕ್ಷ ಸ್ಥಾನ, ಮತ್ತು ರಾಷ್ಟ್ರದ ಅತ್ಯುನ್ನತ ಪದ್ಮಪ್ರಶಸ್ತಿಯಾದ “ಪದ್ಮಶ್ರೀ” ಇವರನ್ನು ಅರಸಿಬಂದಿವೆ.

ಫೇಸ್ಬುಕ್ ತಾಣವಾದ “ಪದಾರ್ಥ ಚಿಂತಾಮಣಿ” ಹುಟ್ಟಿಗೆ ಕಾರಣವಾದುದು ಪದಾರ್ಥ ಚಿಂತಾಮಣಿ ಅಂಕಣಕಾರ ಪಾವೆಂ ಆಚಾರ್ಯರಾದರೆ ಈ ಸಮೂಹದ ಸಮ್ಗ್ರ ನಡೆಗೆ ಸ್ಫೂರ್ತಿ ಮತ್ತು ಮಾರ್ಗದರ್ಶನ ಮೊದಲ ತಿದ್ದುತೀಡುಗಳನ್ನು ನೀಡಿದವರು ಪ್ರೊ.ಜೀವಿ. 2015 ರಲ್ಲಿ ನಡೆದ ಪದಾರ್ಥ ಚಿಂತಾಮಣಿ ಸಮೂಹದ ಪದಕಮ್ಮಟ ಉದ್ಘಾಟಿಸಿ ಅವರು ನೀಡಿದ ಮಾರ್ಗದರ್ಶನ ಈ ಸಮೂಹದ ಕನ್ನಡ ಪದ ಚಿಂತನೆಗೆ ದಾರಿದೀಪವಾಗಿದೆ. ಶತಾಯುಷಿ 108 ವರ್ಷದ ತುಂಬು ಮತ್ತು ಬಹಳ ಅರ್ಥಪೂರ್ಣ ಜೀವ ನಡೆಸಿದ ಪ್ರೊ ಜೀವಿಯವರು ಏಪ್ರಿಲ್ 19ರ ಬೆಳಗ್ಗೆ ದೈವಾಧೀನರಾದರು. ಆದರೆ ಅವರ ನಿಘಂಟು ಸಂಪದ, ಅವರ ಕನ್ನಡ ದೇವಿಯ ಮುಡಿಗೆ ಸೇರಿದ ಕೃತಿಕುಸುಮಗಳು ಕನ್ನಡಿಗರ ಮನದಂಗಳದಲ್ಲಿ ಸದಾ ಕಂಪನ್ನು ಸೂಸುತ್ತಾ ಇರುತ್ತವೆಯಾದ್ದರಿಂದ ಜೀವಿಯರ ದೇಹ ದೂರಾದರೂ ಅವರ ಕೊಡುಗೆ ಸದಾ ಹಚ್ಚಹಸಿರು.



Saturday, April 17, 2021

Thursday, December 31, 2020

ಪೂಜ್ಯ ರಾಷ್ಟ್ರಕವಿ ಕುವೆಂಪು ರವರ ವಿಚಾರಧಾರೆಗಳು ಅಗಣಿತ...ಆದರೆ ಅನ್ನದಾತನ ಬಗ್ಗೆ ಅವರ ವಿಚಾರ ಮತ್ತು ಅಭಿಪ್ರಾಯಗಳು ಎಲ್ಲ ಕಾಲಕ್ಕೂ ಆದರಣೀಯ, ಮಂಥನೀಯ, ಗಣನೀಯ. 


ರೈತ-ಕೃಷಿ ನುಡಿಗಳು

ಯಾರೂ ಅರಿಯದ ನೇಗಿಲ ಯೋಗಿಯೆ

ಲೋಕಕೆ ಅನ್ನವನೀಯುವನು

ಹೆಸರನು ಬಯಸದೆ ಅತಿಸುಖಕೆಳಸದೆ

ದುಡಿವನು ಗೌರವಕಾಶಿಸದೆ

ನೇಗಿಲಕುಳದೊಳಗಡಗಿದೆ ಕರ್ಮ

ನೇಗಿಲ ಮೇಲಿಯೆ ನಿಂತಿದೆ ಧರ್ಮ

ಕುವೆಂಪು, ನೇಗಿಲಯೋಗಿ, ಕೊಳಲು ಕವನ ಸಂಕಲನ

 

ಕರಿಯರದೊ ಬಿಳಿಯರದೊ ಯಾರದಾದರೆ ಏನು?

ಸಾಮ್ರಾಜ್ಯವಾವಗಂ ಸುಲಿಗೆ ರೈತರಿಗೆ

ವಿಜಯನಗರವೊ? ಮೊಗಲರಾಳ್ವಿಕೆಯೊ? ಇಂಗ್ಲೀಷರೊ?

ಎಲ್ಲರೂ ಜಿಗಣೆಗಳೆ ನನ್ನ ನೆತ್ತರಿಗೆ

ಕತ್ತಿ ಪರದೇಶಿಯಾದರೆ ಮಾತ್ರ ನೋವೆ?

ನಮ್ಮವರೆ ಹದಹಾಕಿ ತಿವಿದರದು ಹೂವೆ?”

ಕುವೆಂಪು, ರೈತನ ದೃಷ್ಟಿ, ಕೋಗಿಲೆ ಮತ್ತು ಸೋವಿಯಟ್ ರಷ್ಯಾ ಕವನ ಸಂಕಲನ

 

ಹಚ್ಚಿಕೊಳ್ಳಿರೊ ಹಚ್ಚಿಕೊಳ್ಳಿ ಪರಿಮಳಗಳಂ

ಗಂಧ ಅತ್ತರು ಪುನುಗು ಕಸ್ತೂರಿ ಇತ್ಯಾದಿ

ತರತರದ ಭೋಗಮಂ! ಇನ್ನೇಸು ದಿನ ತಾನೆ

ಹಚ್ಚಿಕೊಳ್ಳುವಿರದನು ನಾ ಕಣ್ಣಿನಲೆ ಕಾಂಬೆ!

ನಾಮ ಮುದ್ರೆ ವಿಭೂತಿಗಳ ಬಳಿದುಕೊಂಬವರು

ಕತ್ತೆಯಂದದಿ ಗದ್ದೆಯಲಿ ಗೆಯ್ದು ಮೈಬೆವರು

ಸುರಿಸಿ ಗೊಬ್ಬರ ಮಣ್ಣು ಬಳಿದುಕೊಂಬರಿಗಿಂತ

ಮೇಲೆಂಬ ಭಾವ ತಲೆಕೆಳಗಾಗಿ ಹೋಗುತಿದೆ!

ನೇಗಿಲ ಕುಳಂ ದೊರೆಯ ಕತ್ತಿಯನು ಕಿತ್ತೆಸೆದು,

ಮುತ್ತಿನುಂಡೆಯ ಮುಡಿವ ಸಿರಿನೆತ್ತಿಯನ್ನುತ್ತು

ಬತ್ತಮಂ ಬಿತ್ತಿ ಬೆಳೆಯುವ ಉತ್ತಮದ ಹೊತ್ತು

ಹತ್ತಿರಕೆ ಹತ್ತಿರಕೆ ಬರುತಿರುವುದೊತ್ತೊತ್ತಿ!

ಗೊಬ್ಬರಂ ಸಿಂಹಾಸನಕ್ಕೆರಿದಾ ದಿನಂ

ತನ್ನ ಹೊಗಳಿದ ಕಬ್ಬಿಲನ ಕಬ್ಬಿಗನ ಮಾಡಿ

ಮೆರೆಯುವುದು! ಅಂದು ಗೊಬ್ಬರದ ಕಂಪೆಲ್ಲರ್ಗೆ

ಪರಿಮಳದ್ರವ್ಯ ತಾನಾದಪುದು! ಏತಕೆನೆ,

ಸಿರಿವೆರಸು ಶಕ್ತಿಯಿರೆ ಗೊಬ್ಬರವೆ ಪರಿಮಳಂ;

ಇಲ್ಲದಿರೆ ಪುನುಗು ತಾನಾದೊಡಂ ಗೊಬ್ಬರಂ!”

ಕುವೆಂಪು, ಗೊಬ್ಬರ ಕವಿತೆ, ಕೋಗಿಲೆ ಮತ್ತು ಸೋವಿಯಟ್ ರಷ್ಯಾ ಕವನ ಸಂಕಲನ

 

ಗುಡಿ ಚರ್ಚು ಮಸಜೀದಿಗಳ ಬಿಟ್ಟು ಹೊರಬನ್ನಿ

ಬಡತನವ ಬುಡಮುಟ್ಟ ಕೀಳ ಬನ್ನಿಕುವೆಂಪು

 

 


Friday, December 11, 2020

“ಓದು”- ಒಂದು ವಿಶ್ಲೇಷಣೆ

 

 

“ಓದು”- ಒಂದು ವಿಶ್ಲೇಷಣೆ

                                                                                               

ಓದು – ಒಂದು ಪದ ಹೌದು, ಕ್ರಿಯಾಪದವಾಗಿ ಹೆಚ್ಚು ಬಳಕೆಯಲ್ಲಿದ್ದರೂ ಇದೊಂದು ಹೆಸ್ರು ಪದವೂ ಹೌದು. ಹೆಸರು ಪದ – ಅಂದರೆ ನಾಮ ಪದ.

ಓದು – ಎಂದರೆ ವಿದ್ಯೆ, ಜ್ಞಾನ, ಬುದ್ಧಿ, .. ಕ್ರಿಯಾಪದವಾಗಿ ಓದು ಎಂದರೆ ಅಕ್ಷರಗಳ ಬಂಧದ ಪದಗಳನ್ನು ಉಚ್ಚರಿಸು ಎಂದು.

ಓದು ಅವನಿಗೆ ಹತ್ತಲಿಲ್ಲ ಎಂದರೆ ಅವನು ವಿದ್ಯಾವಂತನಾಗಲಿಲ್ಲ. ಹಾಗೆಂದ ಮಾತ್ರಕ್ಕೆ ಅವನಿಗೆ ಓದಲು ಬರುವುದಿಲ್ಲ ಎಂದೂ ಅಲ್ಲ. ಓದು ಬರಹ ತಿಳಿಯದ ಗಮಾರ..ಎನ್ನುತ್ತಾರೆ ಇಲ್ಲಿ ಅಕ್ಷರ ಗುರುತಿಸಿ ಉಚ್ಚರಿಸಬಲ್ಲ ಕಲಿಯುವಿಕೆಯಿಂದ ವಂಚಿತ ಎಂದಷ್ಟೇ ಹೇಳಬಹುದು. ಗುಂಡ..ಎಲ್ಲಿ ಇದನ್ನು ಓದು..ಎಂದು – ಒಂದು ಕಷ್ಟದ ಅಕ್ಷರಬಂಧದ ಪದಗಣವನ್ನು ತೋರಿಸಿದರೆ ಅಕ್ಷರ ಗುರುತಿಸುವ ಕಲಿಯುವಿಕೆ ತಲೆಗೆ ಹತ್ತಿದ್ದರೆ..ಅಕ್ಷರಗಳನ್ನು ಅಕ್ಷರಗಳನ್ನು ಓದಬಲ್ಲ... ಆದರೆ ಅದರ ವಿನ್ಯಾಸದ ಸಂಪೂರ್ಣತೆಯನ್ನು ಉಚ್ಚಾರದಲ್ಲಿ ತರಲಾರ.

ಬುಟ್ಬುಟ್ಬಂದ್ರೇನ್ತೊಂದ್ರೆ – ಈ ಪದವನ್ನು ಒಮ್ಮೆಗೇ ನಮಗೂ ಉಚ್ಚರಿಸಲಾಗದು..ಅಂದ್ರೆ ನಾವು ಓದುಬರಲಾರದವರು ಎನ್ನಬಹುದೇ. ಓದಿನ ಕ್ಲಿಷ್ಟತೆಗಳ ಆಯಾಮಗಳ ಹಂತವನ್ನು ಸುಲಭವಾಗಿ ದಾಟಲಾರೆವು ಎಂದೇ ಅರ್ಥ. ಹಾಗೆಯೇ ಓದು – ಹಲವಾರು ಮಜಲುಗಳನ್ನು ಹೊಂದಿದೆ. ಇಲ್ಲಿ ಕಣ್ಣು - ಮಿದುಳು – ನಾಲಗೆ ಮತ್ತು ಉಚ್ಚಾರ ಸ್ಪಷ್ಟತೆ ಇಷ್ಟೂ ಗಣನೆಗೆ ಬರುತ್ತವೆ. ಬರವಣಿಗೆಯನ್ನು ನೋಡಿ, ಅಕ್ಷರ ವಿನ್ಯಾಸವನ್ನು ಮಿದುಳಿಗೆ ತಲುಪಿಸಿ, ಅದರ ಪರಿಚಯ ಮೊದಲೇ ದಾಖಲಾಗಿದ್ದರೆ ಉಚ್ಚರಿಸುವ ಮೊದಲು ಸಂಕೇತಗಳನ್ನು ನಾಲಿಗೆಗೆ ತಲುಪಿಸಿ ಅದರಂತೆ ಉಚ್ಚರಿಸಲು ಸಹಕರಿಸುವ ಧ್ವನಿಪೆಟ್ಟಿಗೆಯನ್ನು ಅಣಿಗೊಳಿಸಿ ಹೊರಡಿಸುವ ಶಬ್ದವೇ ಅಕ್ಷರ-ಪದಗಳ ಇರುವಿಕೆಯನ್ನು ಕೇಳುಗರಿಗೆ ತಲುಪಿಸುತ್ತದೆ. ಇನ್ನು ಅಕ್ಷರಗಳಿದ್ದೇ ಓದಬಹುದು ಎನ್ನುವುದೂ ಸಾಧ್ಯ ದೃಶ್ಯಮಾಧ್ಯಮದ ಓದು (ಮೂಕ/ಕಿವುಡ ರ ಟಿವಿ ವಾರ್ತೆಗಳನ್ನು ನೀವೂ ನೋಡಿರುತ್ತೀರಿ...ಆದರೆ ಓದಲಾರಿರಿ!!), ನೋಡದೇ ಓದಬಹುದು ಎನ್ನುವುದು ಸ್ಪರ್ಶಮಾಧ್ಯಮದ ಓದು (ಬ್ರೈಲ್ ಲಿಪಿಯನ್ನು ಓದಬಲ್ಲ ದೃಷ್ಟಿವಂಚಿತರು, ಆದರೆ ಅದನ್ನು ನೋಡಿ ಓದಬಲ್ಲ ನಾವು ಕಣ್ಮುಚ್ಚಿ ಸ್ಪರ್ಷದಿಂದ ಓದಲಾರೆವು!!). ದೃಶ್ಯಮಾಧ್ಯಮದ ಓದು..ಗುಂಡನೂ ಬಲ್ಲ..!! ಮೇಷ್ಟ್ರು ಬೆತ್ತವನ್ನು ಎತ್ತಿಕೊಂಡೊಡನೆಯೇ...”ಸಾ.ಸಾ..ಬ್ಯಾಡ..ಸಾ...ಇನ್ನೊಂದ್ಕಿತ ಓಮ್ವರ್ಕ್ ಮಾಡ್ಕಬತ್ತೀನ್ಸಾ..ಒಡೀಬ್ಯಾಡೀ ಸಾ...ಅಂತಾನೆ”... ಎಂಕ್ಟ..ಏನ್ ಕಮ್ಮೀನಾ...”ಲೋ ಗುಂಡ ,,ನನ್ನುಡ್ಗೀ ಕರೀತಾವ್ಳೇ..  ಓಗ್ಬತ್ತೀನಿ ..ನನ್ ಅಟೆಂಡೆನ್ಸ್ ಕೂಗುದ್ರೆ ನೀನೇ ..ಎಸ್ಸಾ...ಅಂದ್ಬುಡು”...ಅಂತಾನೆ. ತನ್ನ ಹುಡುಗಿ ಏನೂ ಹೇಳಿರುವುದಿಲ್ಲ ..ಅವಳ ಕಣ್ಣೋಟವನ್ನೇ ಓದಿರ್ತಾನೆ!!

ಇನ್ನೊಂದು ಪ್ರಕಾರದ ಓದು... “ಮದುವೆಯಲ್ಲಿ ನಿನ್ ಮಗಂಗೆ ಓದು ಏನೇನು ಬಿತ್ತು?” ಅಂದರೆ ಇಲ್ಲಿ ಓದು ಅಂದರೆ – ಉಡುಗೊರೆಗಳು.

“ಮದ್ವೆಲಿ ಏನಪ್ಪಾ ಓದಿಸ್ದೆ ನೀನು?”

ಒಂದ್ ಮಂಚ, ಒಂದು ಆಸ್ಗೆ, ಒಂದು ಫ್ಯಾನೂ.... ಒಸ ಮದ್ವೆ ಮಕ್ಳು...ಸೆಕೆ ಜಾಸ್ತಿ ಆಯ್ತದಲ್ವಾ?

ಕೇಳಿದವ ಮುಸಿ ಮುಸಿ ನಗ್ತಾನೆ... ಇಲ್ಲಿ ಹೇಳಿದ ಪದ ಒಂದು ಅವನು ಅರ್ಥೈಸಿಕೊಂಡು ಮನದಲ್ಲಿ ಓದಿಕೊಳ್ಳುವ ಪದ/ಪದಗಳು/ ಕಥೆ ನೇ ಬೇರೆ..

ಇನ್ನು..ಸಾಲುಗಳ್ನಡ್ವೆ ಓದೋದನ್ನ – ರಾಜ್ಕಾರಣಿಗಳಿಗೆ, ಪತ್ರಕರ್ತರಿಗೆ ಹೇಳಿಕೊಡಬೇಕಿಲ್ಲ...ಅಂತಾರೆ..

ಇದ್ಯಾವ್ದು..? ಸಾಲುಗಳ ನಡುವೆ ಓದೂ..? ಸಾಲುಗಳ ನಡುವೆ ಖಾಲಿ ಜಾಗ ಇರುತ್ತಪ್ಪಾ...

ಇದೇ ನೋಡಿ...ಕಲ್ಪಿತ ಕಥನ/ಪದ/ವಾಕ್ಯ. ಹೆಚ್ಚು ಬಾರಿ ಇದು ಕಥನವೇ ಆಗಿರುತ್ತೆ.

ಓದಿನ ವ್ಯಾಪ್ತಿ ಓದಿಗೇ ಗೊತ್ತು

ಓದಿದರೆ ಓದು ಬರಿ ಅಕ್ಷರ

ಅಕ್ಷರವೊಂದು, ಅರ್ಥ ನೂರು

ಅದು ಓದಿನ ಪಕ್ವತೆಯ ಸೂರು.

Friday, October 30, 2020

 


ನುಡಿಯಡಿಗೆ ನಡೆ

ನುಡಿಯಲಿದು ನಡೆ
ಎಡೆಬಿಡದೆ ನಡೆ
ಬಿಡದೇ ಕನ್ನಡ 
ದಡಸೇರಲಿದೆ ಗಡ

ಉಲಿಯಲಿದು ಸಿರಿ ಅಕ್ಕರ
ಸುಲಿದಂತೆ ಬಾಳೆ ಜೊತೆ
ತಿಂದಂತೆ ಶರ್ಕರ
ಬಿಗುಮಾನವ ಬಿಡೆ
ನುಡಿಯಡಿಗೆ ನಡೆ

ಸಕ್ಕಕೂ ಮೊದಲಂತೆ
ನುಡಿಯಾಗಿ ಮೆರೆದಂತೆ
ದ್ರಾವಿಡದ ದಡದಲ್ಲಿ
ಆದಿ ಮರ ಬುಡದಲ್ಲಿ
ಆಸಕ್ತಿಯ ಕೊಡೆ
ನುಡಿಯಡಿಗೆ ನಡೆ
 
ಆದಿಕವಿ -ರವಿ
ಕಾಣದ ಕಂಡ ಕವಿ
ಹಳಗನ್ನಡ, ನಡು
ಕನ್ನಡ, ನವಗನ್ನಡ
ಈಗೇಕೆ ಬಿಡುಗನ್ನಡ?
ಅಂಧಾಭಿಮಾನ ತೊಡೆ
ನುಡಿಯೆಡೆಗೆ ನಡೆ

ಕನ್ನಡಕೆ ಎಂಟು
ಜ್ಞಾನಪೀಠದ ಗಂಟು
ಆದರೂ ಕನ್ನಡಕೆ ಕುಂಟು
ನೆಪಗಳದ್ದೇ ಸದಾ ನಂಟು 
ನವಂಬರಿಗೇ ಮೀಸಲೇಕೆ?
ಅಡ್ಡಿ ಸದಾ ಬಳಸಲೇಕೆ?
ಗಮನವಿರಲಿ ಈ ಕಡೆ
ನುಡಿಯಡಿಗೆ ನಡೆ



Saturday, July 20, 2019

ಕೆಲವು ಹಾಯ್ಕುಗಳು...ಒಂದು ಕವನ

ಸ್ನೇಹ


ಎರಡು ಎಳೆ
ಮಧ್ಯದಲಿ ಇಹುದು
ಅದುವೇ ಸ್ನೇಹ

ಕಮಟು ನಾತ
ಹೆಚ್ಚಾಯಿತಂದ್ರೆ ಗೋತ
ರೋಗಕ್ಕೆ ಸ್ನೇಹ

ಸಂಪದ ಪದ
ಸಂಪನ್ನರಿರುವೆಡೆ
ಒಂಥರಾ ಸ್ನೇಹ

ನಾನು ಕಬ್ಬಿಣ
ಅವಳೋ ಆಯಸ್ಕಾಂತ
ನಮ್ಮದೂ ಸ್ನೇಹ

ಅಪ್ಪ ಮಗಳು
ತಂದೆ ತಾಯಿ ಮಕ್ಕಳು
ಹೀಗಿದೆ ಸ್ನೇಹ

ಬಿಸಿಲ ಬಸಿರು

ಬೇಸಿಗೆಯಲಿದೆ ಬೇಗೆ
ಅದು ಹೇಳಿ ಹೇಗೆ?
ಹೊತ್ತಿಸಿ ನೋಡು
ಒಣ ತೆಂಗಿನ ಸೋಗೆ.

ಬಿಸಿಲ ಬಸಿರೊಳಗೆ
ಉಸುರಿನಲಿದೆ ಬೇಗೆ
ಹಸಿರೆಲೆಯ ಹಾದಿ
ತಂಪು ಇಂಪಾದ ಗಾದಿ.

ಕಣ ಕಣಜಕೆ ಕಾಳು
ಧಣಿ ದಣಿದವನ ಬಾಳು
ಎಸರೆಸರಲಿ ಕನಸು
ಹನಿ ಹನಿದರೆ ನನಸು.

ಮಣ್ಣಲಿ ಅಡಕವಾಗಿದೆ
ಕಣ್ಣರಳಿಸುವ ಮಣ
ಹಣವೆನೆ ಬಾಯ್ಬಿಡುವುದು
ಹೂತಿಟ್ಟ ಸುಟ್ಟ ಹೆಣ.

ಬಾಯ್ಬಿಟ್ಟಿದೆ ಬಿರಿದ ನೆಲ
ಜಲಬಿಂದುವಿನಾಸೆಯಲಿ
ಬಿರಿದ ಒಡಲು ಬಾಳೆ ಮೀನು
ಮೋಡ ಕರಗಿ ಹನಿಯಲಿ.

ಕತ್ತೆ ಮೆರವಣಿಗೆಯಲಿ
ಕಪ್ಪೆರಾಯನು ದಿಬ್ಬಣ
ಮಳೆರಾಯನನು ಕೂಗಿ
ಕರೆಯುತಿದೆ ಓಣಿ ಬಣ.